ឃើញដុនដាបដោយកូវីដខ្លាំងពេក! ក្រុមហ៊ុន Pfizer ចរចាស្វែងរកផ្លូវអនុម័តប្រើប្រាស់វ៉ាក់សាំងរបស់ខ្លួនក្នុងប្រទេសឥណ្ឌា

នាយកប្រតិបត្តិក្រុមហ៊ុន Pfizer លោក Albert Bourla បាននិយាយនៅលើគេហទំព័រ LinkedIn នៅថ្ងៃចន្ទនេះថា ក្រុមហ៊ុន Pfizer កំពុងពិភាក្សាជាមួយរដ្ឋាភិបាលឥណ្ឌាដើម្បីស្វែងរកផ្លូវអនុម័តជាផ្លូវការសម្រាប់ការប្រើប្រាស់វ៉ាក់សាំងការពារជំងឺកូវីដ ១៩ របស់ខ្លួន ។

លោកបាននិយាថា “បច្ចុប្បន្ន វ៉ាក់សាំងរបស់យើង មិនត្រូវបានចុះបញ្ជីនៅក្នុងប្រទេសឥណ្ឌានោះទេ ទោះបីពាក្យសុំរបស់យើងត្រូវបានដាក់ស្នើកាលពីប៉ុន្មានខែមុនក៏ដោយ” ។

លោកបន្តថា “បច្ចុប្បន្ននេះ យើងកំពុងពិភាក្សាជាមួយរដ្ឋាភិបាលឥណ្ឌា នូវផ្លូវអនុម័តជាបន្ទាន់ដើម្បីធ្វើឲ្យវ៉ាក់សាំង Pfizer-BioNTech អាចប្រើបាននៅក្នុងប្រទេសនេះ បន្ទាប់ពីកំពុងដាំក្បាលចុះក្រោមពីវិបត្តិជំងឺកូវីដ ១៩” ។

គួរបញ្ជាក់ថា ប្រទេសឥណ្ឌានៅថ្ងៃចន្ទនេះបានរកឃើញករណីឆ្លងថ្មីនៃជំងឺកូវីដ ១៩ ជាង ៣០ ម៉ឺនករណី ពោលរយៈពេល ១២ ថ្ងៃជាប់គ្នាមកហើយ ហើយធ្វើឲ្យករណីឆ្លងសរុបក្នុងប្រទេសនេះកើនឡើងដល់ជិត ២០ លានករណី ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ ចាក់ដូសដំបូងរបស់វ៉ាក់សាំង AstraZeneca និង Pfizer កាត់បន្ថយការចម្លងកូវីដដល់ទៅ ៥០ ភាគរយ

ចុចអាន ៖ វ៉ាក់សាំង Pfizer និង Moderna ជួយមនុស្សចាស់មិនឲ្យចូលសម្រាកព្យាបាលនៅមន្ទីរពេទ្យដោយកូវីដជិត ១០០ ភាគរយ