ដោយសារវ៉ាក់សាំងនិងការ Lockdown ចំនួនអ្នកជំងឺកូវីដ ទួរគី ទៅព្យបាលនៅមន្ទីរពេទ្យ ធ្លាក់ចុះពាក់កណ្តាល

លោក Fahrettin Koca រដ្ឋមន្រ្តីក្រសួងសុខាភិបាលទួរគីបានប្រកាសកាលពីថ្ងៃចន្ទថា ចំនួនអ្នកជំងឺកូវីដ-១៩ ដែលបានដាក់ពាក្យសុំទៅព្យាបាលនៅមន្ទីរពេទ្យក្នុងរយៈពេល២សប្តាហ៍ចុងក្រោយនេះ នៅទូទាំងប្រទេស បានថយចុះពាក់កណ្តាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់អ្នកសារព័ត៌មាននៅក្នុងខេត្ត Edirne ភាគពាយព្យ, លោក Koca បានកត់សម្គាល់ថា បន្ទាប់ពីយុទ្ធនាការចាក់វ៉ាក់សាំងនិង ការ Lockdown ទាំងស្រុងដែលគ្រោងនឹងបញ្ចប់នៅថ្ងៃទី១៧ខែឧសភា ប្រទេសទួរគី នឹងមានការថយចុះយ៉ាងឆាប់រហ័សនៃចំនួនការឆ្លង។

លោកបន្តថា ចំនួនករណីឆ្លងថយចុះប្រចាំថ្ងៃ នឹងបង្កើតបានជារូបភាពល្អប្រសើរទាក់ទងនឹងចំនួនអ្នកស្លាប់ដោយសារជំងឺកូវីដ-១៩និងចំនួនអ្នកជំងឺធ្ងន់ធ្ងរ។

វិធានការ Lockdown ដ៏តឹងរ៉ឹងបំផុតមិនធ្លាប់មានរបស់ប្រទេសទួរគី បានចាប់ផ្តើមនៅថ្ងៃទី២៩ខែមេសា បន្ទាប់ពីករណីប្រចាំថ្ងៃបានកើនឡើងដល់កម្រិតខ្ពស់បំផុត ពោលគឺជាង៦ម៉ឺនករណី។

ទួរគីបានចាក់វ៉ាក់សាំងកូវីដដល់ប្រជាជនជាង ២៣.៤លាននាក់ ចាប់តាំងពីប្រទេសនេះចាប់ផ្តើមកម្មវិធីចាក់ថ្នាំបង្ការដ៏ធំមួយនៅពាក់កណ្តាលខែមករា ដោយផ្តល់អាទិភាពដល់បុគ្គលិកសុខាភិបាល៕

ប្រែសម្រួលដោយ៖ Vann Vann

ប្រភព៖ Xinhua

ចុចអាន៖ ត្រឹម២សប្តាហ៍ប៉ុណ្ណោះ ករណីឆ្លងកូវីដហក់ឡើងខ្ពស់ជាង៦ខែដំបូង នៅពេលរាតត្បាតផ្ទុះឡើងទៅទៀត