កូវីដ-១៩

មន្ត្រីក្រសួងផែនការម្នាក់ទៀតហើយបានឆ្លងជំងឺកូវីដ១៩ និងមានអ្នកពាក់ព័ន្ធ៧នាក់

បានផុស

៤ years មុន

នៅ

ថ្ងៃអង្គារ ៤ ឧសភា ២០២១

ដោយ

មន្ត្រីនៃអគ្គាធិការដ្ឋានក្រសួងផែនការម្នាក់ទៀតត្រូវបានរកឃើញវិជ្ជមានកូវីដ-១៩ ជាមួយនឹងភរិយានៅថ្ងៃទី០៣ ខែឧសភា ឆ្នាំ២០២១។ ចំណែកអ្នកជិតខាង៦នាក់ផ្សេងទៀតរស់នៅម្តុំអ្នកជំងឺខាងលើត្រូវបានរកឃើញវិជ្ជមានកូវីដ-១៩ កាលពីថ្ងៃទី២៨ ខែមេសា ឆ្នាំ២០២១កន្លងទៅ។

លោក ស្រីដា អ្នកនាំពាក្យក្រសួងផែនការបានមានប្រសាសន៍នៅរសៀលថ្ងៃទី០៤ ខែឧសភា នេះថាមន្ត្រីដែលឆ្លងថ្មីនេះមានឈ្មោះ អ៊ុក ទិត្យសុភ័ក្រ ភេទប្រុសអាយុ៤១ឆ្នាំ មានអាសយដ្ឋាននៅសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។

លោកបានបន្តថា កាលពីព្រឹកថ្ងៃទី៩ ខែមេសា ឆ្នាំ២០២១ លោក សុភ័ក្រ បានអញ្ជើញមកទទួលការចាក់វ៉ាក់សាំងដូសទី១ នៅទីស្ដីការក្រសួងផែនការ និងបន្តអវត្តមានរហូតដល់រសៀលថ្ងៃទី២៣ ខែមេសា ឆ្នាំ២០២១ទើបឃើញវត្តមានរូបលោកមកទទួលការចាក់វ៉ាក់សាំងដូសទី២នៅទីស្ដីការក្រសួង។

លោកបានបន្ថែមថា ចំពោះទីស្នាក់អាស្រ័យបច្ចុប្បន្នរបស់លោក សុភ័ក្រ តំបន់រស់នៅរបស់លោកអ្នកជិតខាងចំនួន៦រូបបានធ្វើតេស្តវិជ្ជមានកូវីដ១៩នៅថ្ងៃទី២៨ ខែមេសា ឆ្នាំ២០២១ហើយរូបលោកអ៊ុកទិត្យ សុភ័ក្ត្រ ព្រមទាំងភរិយាត្រូវបានក្រុមគ្រូពេទ្យយកសំណាកធ្វើតេស្តថ្ងៃទី៣០ ខែមេសាឆ្នាំ២០២១ដោយលទ្ធផលបង្ហាញថ្ងៃទី០៣ខែឧសភាថា មានវិជ្ជមានកូវីដ១៩ទាំងពីរនាក់។

ក្រសួងផែនការសូមណែនាំដល់អ្នកដែលធ្លាប់ប្រាស្រ័យទាក់ទងជាមួយនឹងអ្នកជំងឺខាងលើផ្ទាល់ត្រូវទៅយកសំណាកនៅតាមទីតាំងដែលក្រសួងបានកំណត់ ក្នុងនោះមានមន្ទីរពេទ្យខ្មែរសូវៀត មជ្ឈមណ្ឌលសុខភាពចាក់អង្រែក្រោម វិទ្យាល័យបាក់ទូក វិទ្យាល័យបឹងត្របែក និងសាលាបឋមសិក្សាសុភមង្គលព្រមទាំងដាក់ខ្លួនឲ្យនៅដាច់ដោយឡែករយៈពេល១៤ថ្ងៃ។

ចំពោះអ្នកពាក់ព័ន្ធដោយប្រយោលសូមមេត្តាធ្វើចត្តាឡីស័កនៅតាមផ្ទះរយៈពេល១៤ថ្ងៃ និងតាមដានសុខភាពខ្លួនឯងដោយគោរពវិធានការរបស់ក្រសួងសុខាភិបាល។

នេះជាករណីទី៥ហើយដែលក្រសួងផែនការមានមន្ត្រីឆ្លងជំងឺកូវីដ១៩ក្នុងព្រឹត្តិការណ៍សហគមន៍២០កម្ភៈ៕

អត្ថបទ ៖ សំអឿន