កូវីដ-១៩

ការលក់វ៉ាក់សាំងកូវីដ Pfizer ឆ្នាំនេះនឹងបាន២៦ប៊ីលានដុល្លារ

បានផុស

៤ years មុន

នៅ

ថ្ងៃពុធ ៥ ឧសភា ២០២១

ដោយ

ក្រុមហ៊ុនផលិតវ៉ាក់សាំងអាមេរិក Pfizeer បានទម្លាយពីព្យាករណ៍នៃការលក់វ៉ាក់សាំងការពារកូវីដ-១៩ប្រចាំឆ្នាំរបស់ខ្លួនថា នឹងបានទឹកប្រាក់ប្រមាណ២៦ប៊ីលានដុល្លារអាមេរិកនៅឆ្នាំនេះ។

ក្រុមហ៊ុនបានរំពឹងពីវ៉ាក់សាំងរបស់ខ្លួនលក់បាន១៥ប៊ីលានដុល្លារអាមេរិកប៉ុណ្ណោះនៅឆ្នាំ២០២១ ប៉ុន្តែការកើនឡើង៧៣% ដូច្នេះប្រាក់ចំណូលត្រូវបានរំពឹងទុកថា នឹងឈានដល់២៦ប៊ីលានដុល្លារអាមេរិកសម្រាប់ការប៉ាន់ស្មាន ដោយសារក្រុមហ៊ុនបានគិតទៅលើការបញ្ជាទិញដែលទទួលបាននៅពាក់កណ្តាលខែមេសា និងរំពឹងចុះហត្ថលេខាលើកុងត្រាផ្គត់ផ្គង់លើទឹកប្រាក់រាប់ពាន់លានដុល្លារបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែក វ៉ាក់សាំង Comirnaty ឬ BNT162b2 ត្រូវបានផលិតជាមួយ BioNTech របស់ប្រទេសអាល្លឺម៉ង់ និងមានតម្លៃ៣៩ដុល្លារអាមេរិកសម្រាប់ពីរដូសនៅសហរដ្ឋអាមេរិក និងតម្លៃប្រហែលជា៣០ដុល្លារនៅអឺរ៉ុប។

ក្រុមហ៊ុនបាននិយាយថា ត្រឹមតែ៣ខែដំបូងនៃឆ្នាំ២០២១នេះ ក្រុមហ៊ុនលក់បានទឹកប្រាក់ចំនួន៣.៥ប៊ីលានដុល្លារអាមេរិក និងថា ការលក់កាន់តែល្អប្រសើរជាងការរំពឹងទុកដែលនឹងទទួលបានផលចំណេញកាន់តែខ្ពស់។

ការប៉ាន់ស្មានលក់ថ្មីគឺផ្អែកលើកុងត្រាដែលបានចុះហត្ថលេខារួចរាល់សម្រាប់ការចែកចាយវ៉ាក់សាំងចំនួន១.៦ប៊ីលានដូសជាសកលនៅឆ្នាំនេះ។ ក្រុមហ៊ុនបានកំពុងផ្គត់ផ្គង់នៅអាមេរិក ចក្រភពអង់គ្លេស អឺរ៉ុប ជប៉ុន និងអ៊ីស្រាអែល ដែលស្ថិតក្នុងចំណោមប្រទេសមួយចំនួន។

តាមរបាយការណ៍ថា ក្រុមហ៊ុនបានចុះកុងត្រារួចរាល់ហើយជាមួយប្រទេសប្រេស៊ីលសម្រាប់វ៉ាក់សាំង១០០លានដូស។ ក្រុមហ៊ុនបានធ្វើកិច្ចព្រមព្រៀងជាមួយប្រទេសកាណាដា និងអ៊ីស្រាអែលរួចរាល់ដែរសម្រាប់ការផ្គត់ផ្គង់ឆ្នាំនេះ។

ថ្មីៗនេះ សហភាពអឺរ៉ុប បានកើនឡើងនូវការបញ្ជាទិញរបស់ខ្លួនដល់ទៅ៦០០លានដូសសម្រាប់រដ្ឋជាសមាជិកចំនួន២៧ និងត្រូវបានគេរំពឹងថា នឹងបង្កើនចំនួនថែមទៀត។

ប្រធានគណៈកម្មការអឺរ៉ុបលោក Ursula von der Leyen បាននិយាយកាលពីសប្តាហ៍មុនថា អឺរ៉ុបជិតឈានដល់កិច្ចព្រមព្រៀងដ៏ធំមួយសម្រាប់វ៉ាក់សាំងកូវីដ-១៩ ដែលនឹងទិញ១.៨ប៊ីលានដូសនៅត្រឹមឆ្នាំ២០២៣ ដែលគ្រប់គ្រាន់សម្រាប់ចាក់ដល់ប្រជាជនអឺរ៉ុប៤៥០លាននាក់ក្នុងរយៈពេល២ឆ្នាំខាងមុខនេះ៕

ប្រែសម្រួល៖ វីរបុត្រ
ប្រភព៖ reuters

Related Topics:កូវីដ-១៩