គណៈបញ្ជាការឯកភាពខេត្តបន្ទាយមានជ័យប្រជុំបន្ទាន់ពង្រឹងប្រសិទ្ធភាពប្រយុទ្ធប្រឆាំងជំងឺកូវីដ-១៩

បន្ទាយមានជ័យ៖ ដើម្បីជំរុញឱ្យការងារនៃការបង្ការទប់ស្កាត់ជំងឺកូវីដ-១៩ កាន់តែមានប្រសិទ្ធភាពថែមទៀត ដែលអាចឈានទៅកាត់ផ្ដាច់បាននូវការរីករាលដាលនៃជំងឺនេះក្នុងពេលដ៏ខ្លីខាងមុខនេះ គណៈបញ្ជាការឯកភាពខេត្តបន្ទាយមានជ័យបានបើកប្រជុំបន្ទាន់មួយដើម្បីពង្រឹងប្រសិទ្ធភាពការងារប្រយុទ្ធប្រឆាំង​និងជំងឺកូវីដ-១៩ នៅព្រឹកថ្ងៃទី៥ ខែឧសភា ឆ្នាំ២០២១ ដោយមានអ្នកចូលរួម គ្រប់ប្រធានមន្ទីរ និងមន្ត្រីជាប់ពាក់ព័ន្ធជាច្រើននាក់ទៀត។

លោក អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថា អង្គភាពទាំង៣មាន កម្លាំងអាវុធហត្ថ នគរបាល និងកម្លាំងយោធាកំពុងបំពេញការងារនៅតាមតំបន់ក្រហម មានតំបន់នៅក្រុងប៉ោយប៉ែតជាតំបន់បិទខ្ទប់យ៉ាងសកម្ម។ តំបន់បន្ទាប់បន្សំនៅក្រុងសិរីសោភ័ណ ត្រូវបានក្រុមការងារ អាជ្ញាធរ កងកម្លាំង សុខាភិបាល កំពុងបន្តពន្លឿនស្រាវជ្រាវរកអ្នកពាក់ព័ន្ធផ្ទាល់ប្រយោល ដើម្បីយកសំណាក់ពិនិត្យ និងចេញលទ្ធផលនៅពេលខាងមុខនេះ។

លោក អ៊ុំ រាត្រី បានមានប្រសាសន៍បញ្ជាក់ទៀតថា ក្នុងកិច្ចប្រជុំមានបំណងត្រួតពិនិត្យការងារមួយចំនួនរបស់កម្លាំងមានសមត្ថកិច្ចចំណុះឱ្យគណៈបញ្ជាការឯកភាពខេត្តបន្ទាយមានជ័យ និងដាក់ទិសដៅបន្តក្នុងកិច្ចការពារជំងឺរាតត្បាតជំងឺកូវីដ-១៩ នេះ។

លោកបានបញ្ជាក់ឱ្យដឹងបន្តទៀតថា តាមរបាយការណ៍អំពីស្ថានភាពនានានៅក្នុងមូលដ្ឋាន និងជុំវិញការវិវត្តនានានៅក្រុងប៉ោយប៉ែតត្រូវយកមកពិភាក្សាស្វែងរកចំណុចល្អៗ ដែលធ្វើយ៉ាងណាអាចឈានទៅដល់ការផ្តាច់ជំងឺកូវីដ-១៩ បានជោគជ័យនៅពេលដ៏ខ្លីខាងមុខនេះ ព្រមទាំងអំពាវនាវអ្នករស់នៅតំបន់បិទខ្ទប់ និងតំបន់មានការពាក់ព័ន្ធ និងប្រជាពលរដ្ឋទាំងអស់ ត្រូវចូលរួមអនុវត្ត៣ការពារនិង៣កុំ ។

លោក អ៊ុំ រាត្រី បានប្រាប់ថា រដ្ឋបាលខេត្តខិតខំពង្រឹងគ្រប់គ្រងតំបន់បិទខ្ទប់ តំបន់ក្រហម ការនាំអ្នកសង្ស័យដែលប៉ះពាល់ដោយផ្ទាល់ និងដោយប្រយោលមកយកវត្ថុសំណាករកមេរោគកូវីដ-១៩ ការនាំអ្នកវិជ្ជមាន ឬអ្នកជំងឺកូវីដ-១៩ ទៅថែទាំព្យាបាលនៅកន្លែងបានកំណត់។ ក្នុងនោះ រដ្ឋបាលខេត្ត និងមន្ទីរសុខាភិបាលកំពុងរៀបចំដំណើរការមន្ទីរពេទ្យ និងមណ្ឌលព្យាបាលអ្នកជំងឺកូវីដ-១៩ ក្នុងខេត្តបន្ទាយមានជ័យកើន១០កន្លែង៕

អត្ថបទ៖ វ៉ាន់ ណាង