ចំនួនអ្នកស្លាប់ដោយ ជំងឺកូវីដ ១៩ នៅប្រេស៊ីល កើនដល់ ៤១ ម៉ឺននាក់

ប្រទេសប្រេស៊ីលកាលពីថ្ងៃអង្គារ បានរាយការណ៍ថា មានអ្នកស្លាប់ថ្មី ដោយសារជំងឺកូវីដ ១៩ ចំនួន ២,៩៦៦ នាក់ ក្នុងរយៈពេល ២៤ ម៉ោងចុងក្រោយ ដោយនាំឲ្យចំនួនអ្នកស្លាប់ ទូទាំងប្រទេសឡើងដល់ ៤១១,៥៨៨ នាក់ ។

ទន្ទឹមនឹងនេះដែរ ប្រទេសប្រេស៊ីល ក៏បានរកឃើញករណីឆ្លងថ្មីចំនួន ៧៧,៣៥៩ ករណីផងដែរ ដែលនាំឲ្យករណីឆ្លងសរុបឡើងដល់ ១៤,៨៥៦,៨៨៨ ករណី ។

បច្ចុប្បន្ន ប្រទេសប្រេស៊ីល មានចំនួនអ្នកស្លាប់ដោយសារជំងឺកូវីដ ១៩ ខ្ពស់បំផុតទី ២ នៅលើពិភពលោក បន្ទាប់ពីសហរដ្ឋអាមេរិក និងមានការផ្ទុះឡើងនៃករណីឆ្លង ធំជាងគេទី ៣ នៅពីក្រោយសហរដ្ឋអាមេរិក និងឥណ្ឌា ។

យោងតាមក្រសួងសុខាភិបាល ប្រទេសប្រេស៊ីល បានឲ្យដឹងថា បច្ចុប្បន្នមានអត្រាអ្នកស្លាប់ ១៩៦ នាក់ ក្នុងចំណោមប្រជាជន ១០០,០០០ នាក់ និងករណីឆ្លង ៧,០៧០ ករណី ក្នុងចំណោមប្រជាជន ១០០,០០០ នាក់ ។

រដ្ឋ Sao Paulo ដែលជារដ្ឋ មានប្រជាជនច្រើនជាងគេបំផុត នៅក្នុងប្រទេស គឺរងគ្រោះខ្លាំងជាងគេ ដោយមានអ្នកស្លាប់ ៩៨,០២១ នាក់ និងករណីឆ្លងចំនួន ២,៩៤១,៩៨០ ករណី បន្ទាប់មកគឺ ទីក្រុង Rio de Janeiro ដែលមានអ្នកស្លាប់ ៤៥,២៣២ នាក់ និងករណីឆ្លង ៧៥៣,៧៣២ ករណី ។

ស្របពេលជាមួយគ្នានេះ បើយោងតាម សហព័ន្ធអ្នកផ្សព្វផ្សាយព័ត៌មាន បានឲ្យដឹងថា ប្រទេសប្រេស៊ីល បានចាក់វ៉ាក់សាំងការពារជំងឺកូវីដ ១៩ ដល់ប្រជាពលរដ្ឋរបស់ខ្លួនចំនួន ៤៨.៥ លាននាក់ គិតត្រឹមថ្ងៃចន្ទ ។

គួរបញ្ជាក់ថា ប្រទេសប្រេស៊ីល រកឃើញករណីឆ្លងជំងឺកូវីដ ១៩ លើកដំបូងនៅថ្ងៃទី ២៦ ខែកុម្ភៈ ឆ្នាំ ២០២០ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA