អាជ្ញាធរខេត្តត្បូងឃ្មុំ ត្រៀមមណ្ឌលធ្វើចត្តាឡីស័កកម្រិត១​ និងកម្រិត២​បន្ថែម

ត្បូងឃ្មុំ​៖​ អាជ្ញាធរខេត្តត្បូងឃ្មុំ​ បានត្រៀមមណ្ឌលធ្វើចត្តាឡីស័កកម្រិត១​ និងកម្រិត២​ សរុបចំនួន៤ទីតាំង​ ក្នុងភូមិសាស្ត្រខេត្តត្បូងឃ្មុំ​ ដើម្បីដាក់ពលករដែលមកពីក្រៅប្រទេស​និងអ្នកជាប់ពាក់ព័ន្ធជាមួយអ្នកវិជ្ជមានកូវីដ-១៩​ ខណៈ​មានអ្នកជាប់ពាក់ព័ន្ធច្រើននាក់ទៅនឹងព្រឹត្តិការណ៍២០​កុម្ភៈ​។

លោកវិជ្ជបណ្ឌិត​ កែវ​ វណ្ណៈ​ ប្រធាន​មន្ទីរសុខាភិបាលខេត្តត្បូងឃ្មុំ​ បានឱ្យដឹងថា​ ក្រោយពីមានចំនួនអ្នកសង្ស័យ​ពាក់ព័ន្ធ​ជាមួយ​ អ្នកវិជ្ជមានកូវីដ​-១៩​ ក្នុងខេត្ត សរុប១,៧០០នាក់ជាង​ អាជ្ញាធរខេត្តត្បូងឃ្មុំ​ បានចុះសហការជាមួយអាជ្ញាធរមូលដ្ឋាន​ កងកម្លាំងប្រដាប់អាវុធ​ ធ្វើការរកមណ្ឌលចត្តាឡីស័ក​ ជាក់ស្តែង​មាន វិទ្យាល័យ​ សម្តេច​តេជោ​ ហ៊ុន​ សែន​ តំបែរ​ ស្រុកតំបែរ​ ដែលត្រូវត្រៀមធ្វើកន្លែងចត្តាឡីស័ក​និងជាកន្លែងផ្តល់ភាពងាយស្រួលដល់ការមើលថែរទាំ​សុខភាព​ និងទំនុកបម្រុងផ្គត់ផ្គង់អាហារ​។

លោកវិជ្ជបណ្ឌិត​ បន្ថែមទៀត​ថា​ ចុះផ្សព្វផ្សាយវិធានការសុខាភិបាល បីកុំបីការពារ និងត្រូវបន្តរៀបចំ ពង្រីកបន្ថែមមណ្ឌលចត្តាឡីស័ករបស់រដ្ឋបាលស្រុកបន្ថែមពីអ្វីដែលបានរៀបចំកន្លងមក ដើម្បីត្រៀមលក្ខណៈក្នុងករណីផ្ទុះរីករាលនៃជំងឺកូវីដ-១៩ ក្នុងមូលដ្ឋានដែលប្រឈម។

ចំពោះពលរដ្ឋដែលពាក់ព័ន្ធត្រូវបន្តគ្រប់គ្រងអ្នកប៉ះពាល់ដោយផ្ទាល់ត្រូវដាក់ឱ្យធ្វើចត្តាឡីស័កនៅមណ្ឌលចត្តាឡីស័កស្រុក ដែលបានត្រៀម និងអ្នកប៉ះពាល់ដោយប្រយោល ត្រូវដាក់ខ្លួនឱ្យធ្វើចត្តាឡីស័កនៅតាមផ្ទះរៀងៗខ្លួន៕​

អត្ថបទ​ និង​ រូបភាព​៖ ហុង​ ម៉េងហៀ​