កូវីដ-១៩

ក្រុមគ្រូពេទ្យជួរមុខពេទ្យរុស្សី បានជួយសម្រាលកូនដល់ស្ត្រីមានវិជ្ជមានកូវីដ១៩ម្នាក់ ដែលមានកូនទទឹងពោះនិងទឹកភ្លោះរីងអស់ ដោយជោគជ័យ

បានផុស

៤ years មុន

នៅ

ថ្ងៃព្រហស្បតិ៍ ៦ ឧសភា ២០២១

ដោយ

ក្រុមគ្រូពេទ្យជួរមុខនៃមន្ទីរពេទ្យរុស្សី បានជួយសម្រាលកូនដល់ស្ត្រីមានវិជ្ជមានកូវីដ១៩ម្នាក់ មានកូនទទឹងពោះ និងទឹកភ្លោះរីងអស់ ដោយជោគជ័យនិងមានសុខសុវត្ថិភាពទាំងម្តាយនិងកូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកសាស្ត្រាចារ្យ ងី ម៉េង ប្រធានមន្ទីរពេទ្យមិត្តភាពខ្មែរសូវៀត(ពេទ្យរុស្សី)បានឲ្យដឹងថា អ្នកជំងឺកូវីដ-១៩ម្នាក់ ដែលមានមានកូនទទឹងពោះ និងទឹកភ្លោះរីងអស់នេះបញ្ជូនមកពីមជ្ឈមណ្ឌលជាតិគាំពារមាតា និងទារក នៅវេលាម៉ោង២:១០ព្រឹកថ្ងៃទី ០៦ខែ ខែឧសភា ឆ្នាំ២០២១ ក្រុមគ្រូពេទ្យជួរមុខនៃមន្ទីរពេទ្យមិត្តភាពខ្មែរ-សូវៀត បានខិតខំប្រឹងប្រែងវះកាត់សម្រាលកូនជូនអ្នកជំងឺកូវីដ-១៩ បានដោយជោគជ័យ និងសុខសុវត្ថិភាពទាំងម្តាយ និងកូន។ លោកសាស្ត្រាចារ្យបានបន្តថា នេះជាកូនទី ១០ហើយ ដែលមន្ទីរពេទ្យបានសម្រាលជូនអ្នកជំងឺកូវីដ ១៩។

លោកសាស្ត្រាចារ្យបានបន្តទៀតថា កាលពីយប់ថ្ងៃទី០២ ខែឧសភា ឆ្នាំ២០២១ កន្លងទៅ ក្រុមគ្រូពេទ្យជួរមុខនៃមន្ទីរពេទ្យមិត្តភាពខ្មែរ-សូវៀត បានខិតខំប្រឹងប្រែងអស់ពីកម្លាំងកាយចិត្តសម្រាលកូនជូនអ្នកជំងឺកូវីដ-១៩ ចំនួន ០២ នាក់ទៀត ដោយម្នាក់សម្រាលដោយធម្មជាតិ និងម្នាក់ទៀតដោយវះកាត់បានដោយជោគជ័យ និងសុខសុវត្ថិភាពទាំងម្តាយ និងកូនផងដែរ។ លោកសាស្ត្រាចារ្យ ងី ម៉េង បានបញ្ជាក់ថា« តាងនាមឲ្យថ្នាក់ដឹកនាំមន្ទីរពេទ្យមិត្តភាពខ្មែរ-សូវៀត សូមថ្លែងអំណរគុណយ៉ាងជ្រាលជ្រៅ និងសូមជូនពរ ដល់ក្រុមគ្រូពេទ្យទាំងអស់ ទទួលបាននូវសុខភាពល្អ និងសុវត្ថិភាព ជៀសផុសពីជំងឺដ៏កាចសាហាវនេះ»។

គួរបញ្ជាក់ថា មន្ទីរពេទ្យមិត្តភាពខ្មែរសូវៀតជាមន្ទីរពេទ្យលេចធ្លោមួយដែលបានជួយព្យាបាលជំងឺកូវីដ១៩ បានជាសះស្បើយយ៉ាងច្រើនហើយ បច្ចុប្បន្នមន្ទីរពេទ្យនេះ ត្រូវបានក្រសួងសុខាភិបាលដាក់សម្រាប់ព្យាបាលអ្នកជំងឺកូវីដណា ដែលមានភាពធ្ងន់ធ្ងរប៉ុណ្ណោះ៕

អត្ថបទ៖ សំអឿន

សូមចុចអាន៖ ដឹងថាហានិភ័យខ្ពស់ តែមន្ត្រីសមត្ថកិច្ចនៅតែចុះជួយប្រជាពលរដ្ឋ រហូតឆ្លងកូវីដខ្លួនឯង