ស្ថានភាពយ៉ាប់យ៉ឺន! អ្នកជំងឺកូវីដឥណ្ឌា ត្រូវដាក់ឲ្យដេកគ្រែមួយ៤នាក់ ហើយគ្រូពេទ្យបង្ខំចិត្តយកសពទៅបូជាដោយខ្លួនឯង

ស្របពេលដែលវិបត្តិជំងឺកូវីដ-១៩របស់ប្រទេសឥណ្ឌា ហាក់ដូចជាមិនបង្ហាញសញ្ញាថមថយសោះនោះ លោកវេជ្ជបណ្ឌិត Pransant Munde លេខាធិការសមាគមគ្រូពេទ្យរដ្ឋ Maharashtra បានប្រាប់សារព័ត៌មាន Arab News កាលពីថ្ងៃពុធថា “មន្ទីរពេទ្យរដ្ឋតែមួយគត់គឺមន្ទីរពេទ្យ Sassoon កំពុងធ្វើការហួសសមត្ថភាព ហើយមន្ទីរពេទ្យនេះកំពុងខ្វះខាតការផ្គត់ផ្គង់គ្រប់មុខ”។

លោក Munde និយាយថា ស្ថានភាពគឺពិបាកខ្លាំងណាស់ ដោយពេលខ្លះ អ្នកជំងឺបួននាក់ត្រូវបានដាក់ឲ្យដេកនៅលើគ្រែតែមួយ ហើយបន្ទាប់មកត្រូវបានព្យាបាល។

លោកបន្ថែមថា មានគ្រូពេទ្យជាង៥០០នាក់ទៅហើយ ដែលបានធ្វើតេស្តវិជ្ជមានជំងឺកូវីដ-១៩នៅក្នុងរដ្ឋ Maharashtra។

លោកបន្តថា “យើងមានអារម្មណ៍អស់សង្ឃឹម នៅពេលយើងឃើញអ្នកជំងឺស្លាប់នៅចំពោះមុខ ដោយសារកង្វះអុកស៊ីសែនឬការយកចិត្តទុកដាក់”។

ក្រុមគ្រូពេទ្យមិនត្រឹមតែព្យាបាលអ្នកជំងឺប៉ុណ្ណោះទេ ប៉ុន្តែថែមទាំងយកសាកសពទៅបូជាផងដែរ ទោះនេះមិនមែនជាការងាររបស់ក្រុមគ្រូពេទ្យក៏ដោយ។ យើងតែងតែប្រឈមមុខនឹងហានិភ័យនៃការឆ្លងមេរោគជានិច្ច”។

គួរបញ្ជាក់ថា កាលពីថ្ងៃព្រហស្បតិ៍ ប្រទេសឥណ្ឌា បានរាយការណ៍ពីករណីឆ្លងក្នុងកម្រិតកំណត់ត្រថ្មីចំនួន ៤១២,២៦២ករណីនិងស្លាប់ ៣,៩៨០នាក់ដែលក៏ជាចំនួនកំណត់ត្រាផងដែរ៕

ប្រែសម្រួលដោយ៖ Vann Vann

ប្រភព៖ Arab News

ចុចអាន៖ អាចារ្យឥណ្ឌាអះអាងថា កូវីដ កើតឡើងដោយសារ “ព្រះខឹង”