តំបន់​លឿង​ក្នុង​ខណ្ឌ​ចំការមន មាន​ជាង​សំណង់​ជិត ៣០ នាក់ មាន​វិជ្ជមាន​កូវីដ ១៩

អាជ្ញាធរ​រាជធានី​ភ្នំពេញ​បាន​ឲ្យ​ដឹង​ថា​ មាន​កម្មករ​​សំណង់​ជាង ៣០ នាក់ បាន​ឆ្លង​កូវីដ ១៩ នៅ​ខណ្ឌ​ចំការមន។

ខណ្ឌ​ចំការមន​គឺ​ជា​តំបន់​លឿងដែល​អាជ្ញាធរ​អនុញ្ញាត​ឲ្យ​ពលរដ្ឋ​អាច​ចរាចរ​ធ្វើដំណើរ និង​ប្រកប​របរ​ឡើង​វិញ​បាន។

យ៉ាងណា ប្រភពពី​​អាជ្ញាធរ​មិន​បាន​បញ្ជាក់​ទីតាំង​ការដ្ឋាន​សំណង់​ដែល​រកឃើញ​កម្មករ​​​ជាង ៣០ នាក់​ ឆ្លង​កូវីដ​១៩ នោះ​ទេ។

ខណ្ឌ​ចំការមន​មាន ៥ សង្កាត់​គឺ​សង្កាត់​ទួលទំពូង ១ សង្កាត់​ទួលទំពូង ២ សង្កាត់​ផ្សារ​ដើមថ្កូវ សង្កាត់​បឹងត្របែក និង​សង្កាត់​ទន្លេបាសាក់។ ​ការដ្ឋាន​សំណង់​ធំៗ​ច្រើន​នៅ​សង្កាត់​ទន្លេ​បាសាក់ ជាពិសេស​នៅ​ទីក្រុង​កោះពេជ្រ ដែល​មាន​ការ​អភិវឌ្ឍ​សំណង់​អគារ​ខ្ពស់ៗ​ជាច្រើន។

ប្រកាស​ម្សិលមិញនេះ នៅរាជធានីភ្នំពេញរកឃើញករណីវិជ្ជមានកូវីដ​ថ្មី​ចំនួន ៥៧៨នាក់ ដែលជាករណីឆ្លងក្នុងសហគមន៍។ តំបន់​ចំនួន ៥ នៅតែ​ជា​ចំណុច​ក្តៅ​ក្នុង​ការ​ឆ្លង​រាលដាលធ្ងន់ធ្ងរ​​ក្នុង​នោះ​មាន​ខណ្ឌ​មានជ័យ​ដែលមាន​សង្កាត់ស្ទឹងមានជ័យ​ទី ៣ ស្ទឹងមានជ័យទី ២ ស្ទឹងមានជ័យទី ១ ​ខណ្ឌ​ពោធិសែនជ័យ​មាន​សង្កាត់​ចោមចៅ​១ និង​សង្កាត់ទួលសង្កែ​១ របស់​ខណ្ឌ​ឫស្សីកែវ៕