អស្ចារ្យណាស់! វ៉ាក់សាំង Moderna មានប្រសិទ្ធភាពការពារកូវីដលើមនុស្សអាយុពី ១២ ទៅ ១៧ ឆ្នាំរហូតដល់ ៩៦ ភាគរយ

ក្រុមហ៊ុន Moderna បានផ្តល់ព័ត៌មានថ្មីៗ ដល់ការសិក្សាដំបូងរបស់ខ្លួន លើអ្នកដែលមានអាយុពី ១២ ទៅ ១៧ ឆ្នាំ ខណៈការសាកល្បងនោះ បង្ហាញថា វ៉ាក់សាំងនេះ មានអត្រាប្រសិទ្ធភាពការពារ ជំងឺកូវីដ ១៩ រហូតដល់ ៩៦ ភាគរយ ។

ទន្ទឹមនោះ ក្រុមហ៊ុន Moderna ក៏បានប្រកាសកាលពីថ្ងៃព្រហស្បតិ៍ នូវការកើនឡើងទឹកប្រាក់ ៤.៣ ភាគរយ ពោលចំនួន ១៩.២ ពាន់លានដុល្លារ ពាក់ព័ន្ធនឹងការព្យាករណ៍នៅឆ្នាំ ២០២១ ពីលក់វ៉ាក់សាំងការពារជំងឺកូវីដ ១៩ ក្រោយមានការអនុម័ត ប្រើប្រាស់ជាបន្ទាន់ពី WHO និងប្រសិទ្ធភាពជិត ១០០ ភាគរយ ក្នុងការការពារលើ មនុស្សវ័យជំទង់មួយនេះ ។

សេចក្តីប្រកាស របស់ក្រុមហ៊ុនជីវបច្ចេកវិទ្យា របស់សហរដ្ឋអាមេរិក បានកើតឡើង នៅពេលដែលក្រុមហ៊ុនផលិតវ៉ាក់សាំងមួយនេះ កំពុងព្យាយាមបង្កើនការផ្គត់ផ្គង់ ដើម្បីឆ្លើយតបទៅនឹងតម្រូវការ របស់បណ្តាប្រទេសដែលចង់បានវ៉ាក់សាំង ស្តុកទុកសម្រាប់ឆ្នាំក្រោយ ។

បន្ថែមពីនេះ ក្រុមហ៊ុនក៏បាននិងកំពុង ធ្វើការពង្រីកពេលវេលាផ្ទុកវ៉ាក់សាំង ក្នុងសីតុណ្ហភាពក្នុងទូទឹកកកផងដែរ ។

ទិន្នន័យនាពេលបច្ចុប្បន្ន វ៉ាក់សាំង Moderna អាចស្តុកទុកក្នុងទូទឹកកក បានរយៈពេល ៣ ខែក្នុងសីតុណ្ហភាព ២ ទៅ ៨ អង្សាសេ ដើម្បីសម្រួលដល់ការចែកចាយ ដល់មន្ទីរពេទ្យ និងកន្លែងផ្សេងៗទៀត ប្រសិនបើមានការអនុញ្ញាត ។

ដំបូងឡើយ វ៉ាក់សាំងនេះ ត្រូវបានអនុញ្ញាតិឲ្យ ទុកបានរយៈពេលរហូតដល់មួយខែប៉ុណ្ណោះ នៅសីតុណ្ហភាព ២ ទៅ ៨ អង្សាសេ និងរហូតដល់ ៧ ខែ នៅក្នុងទូទឹកកកស្តង់ដារ -២០ អង្សាសេ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ក្រោយ WHO អនុម័តប្រើប្រាស់ជាបន្ទាន់ ប្រទេសក្រីក្រត្រៀមទទួលវ៉ាក់សាំង Moderna ចំនួន ៥០០ លានដូសពីកម្មវិធី COVAX