ថៃ រំពឹងទទួលវ៉ាក់សាំង Pfizer រហូតដល់ ២០ លានដូស នៅពាក់កណ្តាលឆ្នាំនេះ

រដ្ឋមន្រ្តីក្រសួងសុខាភិបាល នៃប្រទេសថៃ បាននិយាយនៅថ្ងៃសុក្រនេះថា ប្រទេសនៅតំបន់អាស៊ីអាគ្នេយ៍មួយនេះ រំពឹងថា នឹងទទួលបានវ៉ាក់សាំង Pfizer ចំនួន ១០ ទៅ ២០ លានដូស នាពាក់កណ្តាលឆ្នាំនេះ ។

លោក Anutin Charnvirankul រដ្ឋមន្រ្តីក្រសួងសុខាភិបាល បានប្រកាសនៅលើទំព័រហ្វេសប៊ុក របស់លោកថា “វ៉ាក់សាំង Pfizer នឹងមកដល់នាពេលខាងមុខ ។ យើងរំពឹងថានឹងទទួលបាន ១០ ទៅ ២០ លានដូស ប្រសិនបើលក្ខខណ្ឌ ត្រូវបានយល់ព្រម ហើយការផ្គត់ផ្គង់ នឹងមកដល់នៅត្រីមាសទី ៣ និងទី ៤ នៃឆ្នាំនេះ ។

ប្រទេសថៃកំពុងញាប់ដៃញាប់ជើង ដើម្បីទទួលបានការផ្គត់ផ្គង់វ៉ាក់សាំងបន្ថែម ចាប់តាំងពីខែមេសា បន្ទាប់ពីបានឃើញការឆ្លងរាលដាលខ្លាំងបំផុតរបស់ខ្លួនមកទល់ពេលនេះ ។

នៅថ្ងៃសុក្រនេះ អាជ្ញាធរបានរាយការណ៍ថា មានអ្នកស្លាប់ថ្មី ដោយសារជំងឺកូវីដ ១៩ ចំនួន ២៧ នាក់ដែលជាការស្លាប់ ប្រចាំថ្ងៃខ្ពស់បំផុតទី ២ របស់ខ្លួន ដែលធ្វើឲ្យចំនួនអ្នកស្លាប់សរុបកើនឡើងដល់ ៣៦៣ នាក់ ។

ទន្ទឹមនោះ ប្រទេសក្នុងតំបន់អាស៊ីអាគ្នេយ៍មួយនេះ ក៏បានរាយការណ៍ពីករណីឆ្លថ្មី នៃជំងឺកូវីដ ១៩ ចំនួន ២,០៤៤ ករណីផងដែរ ដែលធ្វើឲ្យចំនួនអ្នកឆ្លង សរុបកើនឡើងដល់ ៧៨,៨៥៥ នាក់ ចាប់តាំងពីរោគរាតត្បាត បានកើតឡើងកាលពីឆ្នាំមុន ។

គួរបញ្ជាក់ថា ប្រទេសថៃគ្រោងនឹងចាក់វ៉ាក់សាំងដល់ប្រជាជន ៧០ ភាគរយនៃប្រជាជនរបស់ខ្លួន ក្នុងនោះប្រជាជនថៃប្រមាណ ៦៧ លាននាក់ និងជនបរទេស ៣ លាននាក់ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ កូវីដ​កាន់​តែ​ផ្ទុះ​ខ្លាំង​នៅ​ថៃ! Mai Davika រៀប​ចំ​ប្រអប់​គ្រឿង​ឧបត្ថម្ភ​​ ចែក​ជូន​​អ្នក​ខ្វះខាត​ភ្លាម

ចុចអាន ៖ ខណៈករណីឆ្លង និងស្លាប់ដោយកូវីដកើនឡើងរាល់ថ្ងៃ ថៃ ត្រៀមចាក់វ៉ាក់សាំងដល់ជនបរទេសដែលរស់នៅក្នុងប្រទេសខ្លួន