កូវីដ នៅ ឥណ្ឌា កំពុងរាលដាលដូចភ្លើងឆេះព្រៃ ដោយមានអ្នកឆ្លង ៤ ករណីរៀងរាល់វិនាទី និងស្លាប់ច្រើនជាង ២ នាក់ក្នុងមួយនាទី

អង្គការ UNICEF បាននិយាយកាលពីថ្ងៃសុក្រថា រលកថ្មី នៃការឆ្លងជំងឺកូវីដ ១៩ កំពុងរីករាលដាល ដូចជា “ភ្លើងឆេះព្រៃ” នៅទូទាំងប្រទេសឥណ្ឌា ពោលមានករណីឆ្លង ៤ ករណី រៀងរាល់វិនាទី និងស្លាប់ច្រើនជាង ២ នាក់ក្នុងមួយនាទី ។

លោកស្រី Yasmin Haque តំណាងអង្គការ UNICEF ប្រចាំប្រទេសឥណ្ឌា បានប្រាប់អ្នកសារព័ត៌មាន តាមរយៈការខលជាវីដេអូ ក្នុងសន្និសីទសារព័ត៌មានរបស់អង្គការ UN ថា “អ្វីដែលកំពុងកើតឡើងនៅក្នុងប្រទេសឥណ្ឌា គួរតែបង្កើនការប្រកាសអាសន្ន សម្រាប់យើងទាំងអស់គ្នា” ។

លោកស្រីបន្តថា “ករណីឆ្លងជំងឺកូវីដ ១៩ កំពុងមានការកើនឡើង គួរព្រួយបារម្ភនៅអាស៊ីខាងត្បូង ជាពិសេសនៅនេប៉ាល់ ស្រីលង្កា និងម៉ាល់ឌីវ” ។

ជាប្រទេសដែលមានប្រជាជន ច្រើនជាងគេលំដាប់ទី ២ នៅលើពិភពលោក ឥណ្ឌាកំពុងក្លាយជាចំណុចផ្ទុះកូវីដថ្មីនៅលើពិភពលោក ខណៈរលកថ្មីនេះមានទំហំធំជាងរលកទីមួយស្ទើរតែ ៤ ដង ហើយកំពុងរាលដាលយ៉ាងឆាប់រហ័ស ។

ប្រទេសឥណ្ឌាបានបង្កើតកំណត់ត្រា ពិភពលោកថ្មីមួយកាលពីថ្ងៃព្រហស្បតិ៍ បន្ទាប់ពីប្រទេសនេះបាន រកឃើញករណីឆ្លងខ្ពស់បំផុតក្នុងមួយថ្ងៃជាង ៤១២,០០០ ករណីក្នុងរយៈពេល ២៤ ម៉ោងចុងក្រោយ ។

គួរបញ្ជាក់ថា គិតត្រឹមពេលនេះ ប្រទេសឥណ្ឌា មានករណីឆ្លងជំងឺកូវីដ ១៩ ជាង ២១ លានករណី និងមានអ្នកស្លាប់ជាង ២៣ ម៉ឺននាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ កូវីដរលកទី ២ នៅ ឥណ្ឌា នឹងបំផ្លាញប្រទេសទាំងមូល ព្រមទាំងពិភពលោកផងដែរ

ចុចអាន ៖ ឆ្លង​និង​ស្លាប់​មិន​ចេះ​តិច​រាល់​ថ្ងៃ​បែប​នេះ ឥណ្ឌា ថា រលក​ទីបី​នៃ​វីរុស​បំប្លែង​ខ្លួន​ថ្មី​គឺ​ជៀស​មិន​ផុត​ឡើយ