ប្រេស៊ីល ត្រៀមផលិតវ៉ាក់សាំងរុស្ស៊ី Sputnik V ដោយគ្មានការយល់ព្រមពីនិយតករ

ក្រុមហ៊ុនឱសថប្រេស៊ីលដែលមានគម្រោងផលិតវ៉ាក់សាំងការពារជំងឺកូវីដ ១៩ Sputnik V របស់រុស្ស៊ី នឹងចាប់ផ្តើមផលិតវ៉ាក់សាំងនេះនៅសប្តាហ៍ក្រោយ នៅមុនពេលដែលនិយតករសុខភាព Anvisa ផ្តល់ការយល់ព្រមសម្រាប់ការប្រើប្រាស់នៅក្នុងប្រទេសប្រេស៊ីល ។

នាយកប្រតិបត្តិ និងជាស្ថាបនិកលោក Fernando Marques បាននិយាយថា រោងចក្ររបស់ក្រុមហ៊ុន União Quimica នៅទីក្រុង Sao Paulo ត្រូវបានបញ្ជាក់ដោយនិយតករ Anvisa សម្រាប់ការអនុវត្តផលិតកម្មល្អ ហើយវ៉ាក់សាំងនឹងត្រូវបានផលិតសម្រាប់នាំចេញទៅកាន់ប្រទេសដែលបានយល់ព្រម ។

កាលពីសប្តាហ៍មុននិយតករ Anvisa បានបញ្ឈប់ការអនុម័តការនាំចូលវ៉ាក់សាំង Sputnik V ដែលត្រូវបានស្វែងរកដោយអភិបាលរដ្ឋប្រេស៊ីល ចំពេលមានរលកទីពីរនៃវីរុសដែលបានសម្លាប់ប្រជាជនប្រេស៊ីលជាង ៤១៥,០០០ នាក់ ។

ទន្ទឹមនោះលោក Marques កាលពីថ្ងៃសុក្របានប្រាប់គណៈកម្មការព្រឹទ្ធសភាស្ដីពីជំងឺកូវីដ ១៩ ថា ក្រុមហ៊ុន Uniao Quimica រំពឹងថានឹងទទួលបានគ្រឿងផ្សំសកម្មពីទីក្រុងមូស្គូនៅសប្តាហ៍ក្រោយ ដើម្បីចាប់ផ្តើមផលិតវ៉ាក់សាំងសម្រាប់នាំចេញនៅឯរោងចក្ររបស់ខ្លួនក្បែរអាកាសយានដ្ឋាន Guarulhos របស់ទីក្រុង Sao Paulo ។

មូលនិធិវិនិយោគផ្ទាល់របស់សហព័ន្ធរុស្ស៊ី (RDIF) ដែលកំពុងធ្វើទីផ្សារលើវ៉ាក់សាំង Sputnik V បង្កើតឡើងដោយវិទ្យាស្ថានស្រាវជ្រាវ Gamaleya របស់ប្រទេសរុស្ស៊ី មានគម្រោងផ្គត់ផ្គង់វ៉ាក់សាំងដល់បណ្តាប្រទេសអាមេរិកឡាទីនចេញពីប្រទេសប្រេស៊ីល ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ វ៉ាក់សាំងកូវីដ Sputnik V របស់រុស្ស៊ី ត្រៀមទទួលបានភ្លើងខៀវប្រើប្រាស់ពី WHO នាខែក្រោយ