ខេត្តព្រៃវែងប្រកាសរកឃើញអ្នកវិជ្ជមានកូវីដ-១៩ថ្មីម្នាក់ទៀត ជាកម្មកររោងចក្រមកពីជាតំបន់​ក្រហម​នៅភ្នំពេញ

រដ្ឋបាលខេត្តព្រៃវែងបានបង្ហាញអត្តសញ្ញាណអ្នកវិជ្ជមានកូវីដ១៩ម្នាក់ឈ្មោះ ចុន ជីន ភេទស្រី អាយុ៣៨ឆ្នាំ រស់នៅស្រុកមេសាង ជាកម្មកររោងចក្រមកពីជាតំបន់ក្រហមនៅរាជធានីភ្នំពេញ។បើតាមរដ្ឋបាលខេត្តព្រៃវែងអ្នកជំងឺឈ្មោះ ចុន ជីន នេះស្នាក់នៅភូមិទួលពង្រ សង្កាត់ចោមចៅ​ទី១ ខណ្ឌពោធិ៍សែនជ័យ ជាតំបន់ក្រហម និងជាកម្មការនីរោងចក្រ​កាត់ដេរបានមកដល់ផ្ទះក្នុងភូមិជីផុច ឃុំជីផុច ស្រុកមេសាង វេលាម៉ោង២រសៀល ថ្ងៃទី០៧ ខែឧសភា ឆ្នាំ២០២១នេះ។

ដំបូងឡើយអ្នកជំងឺនេះ មានអារម្មណ៍មិនស្រួលខ្លួន គាត់ក៏បានហៅពេទ្យមកពិនិត្យនៅផ្ទះ តែ​កម្តៅ​នៅបន្តឡើងក្តៅដដែល ហេតុនេះលោកគ្រូពេទ្យបានបញ្ជូនគាត់ទៅមន្ទីរពេទ្យបង្អែកស្រុកដើម្បី​ពិនិត្យ​បន្ថែម។ ពេលនោះ ដោយមានការសង្ស័យខ្ពស់ លោកគ្រូពេទ្យបានធ្វើតេស្តរហ័ស(RapidTest )ជាលទ្ធផលគឺវិជ្ជមានហើយបានបញ្ជួនទៅសម្រាកព្យាបាលនៅមន្ទីរពេទ្យបង្អែកស្រុកមេសាង ។

ជាមួយគ្នានេះ រដ្ឋបាលខេត្ត ក៏សូមអំពាវនាវដល់ប្រជាពលរដ្ឋ ដែលធ្លាប់ប្រាស្រ័យទាក់ទងផ្ទាល់ ឬប្រយោលជាមួយអ្នកជំងឺកូវីដ-១៩ខាងលើ ត្រូវរាយការណ៍ជូនអាជ្ញាធរមូលដ្ឋានជាបន្ទាន់ និងចូល​រួមយកសំណាកនៅមណ្ឌលសុខភាព ឬមន្ទីរពេទ្យបង្អែកស្រុកព្រមទាំងដាក់​ខ្លួនឲ្យនៅដាច់ដោយ​ឡែករយៈពេល១៤ថ្ងៃ និងដាក់ចេញវិធានការនានា ដើម្បីថែទាំសុខភាព និងទប់ស្កាត់កុំឲ្យ​មានការ​ចម្លងបន្ត។

គួរបញ្ជាក់ថាគិតត្រឹមថ្ងៃទី៧ ខែឧសភា ខេត្តព្រៃវែងមានអ្នកឆ្លងជំងឺកូវីដ១៩ចំនួន១២១ នាក់ អ្នកជា​សះស្បើយចំនួន៧០នាក់ ស្លាប់១នាក់ និងអ្នកកំពុងសម្រាកពេទ្យចំនួន៤៩នាក់៕

អត្ថបទ ៖ សំអឿន