ស្ថានភាពនឹងទៅជាយ៉ាងណា? ឥណ្ឌា ត្រៀមប្រារព្ធពិធីបុណ្យសាសនាមួយទៀត

ខណៈការកើនឡើង នៃករណីឆ្លងជំងឺកូវីដ ១៩ និងមុនពេលពិធីបុណ្យ Eid al-Fitr រដ្ឋបាលនៅរដ្ឋ​ Jammu និងតំបន់កាស្មៀរ ដែលគ្រប់គ្រងដោយឥណ្ឌា កាលពីថ្ងៃអាទិត្យបានបន្ថែម ការបិទខ្ទប់រយៈពេលមួយសប្តាហ៍ទៀត ។

ពិធីបុណ្យ Eid al-Fitr ជាប្រារព្ធធ្វើឡើង ដើម្បីបិទបញ្ចប់នៃបុណ្យរ៉ាម៉ាដន ដែលជាខែបួស និងការតមអាហារ របស់អ្នកកាន់សាសនាឥស្លាម ហើយវាមានរយៈពេល រហូតដល់ ២៩ ទៅ ៣០ ថ្ងៃ ក៏ត្រូវបានប្រារព្ធ នៅក្រោមការបិទខ្ទប់ កាលពីឆ្នាំមុនផងដែរ ។

អាជ្ញាធរបាននិយាយថា បម្រាមគោចរដែលត្រូវបានគេសន្មត់ថា នឹងបញ្ចប់នៅម៉ោង ៧ ព្រឹកថ្ងៃទី ១០ ខែឧសភានេះ ត្រូវបានបន្តរហូតដល់ថ្ងៃទី ១៧ ខែឧសភា ។

នាយកដ្ឋានព័ត៌មាន និងទំនាក់ទំនងសាធារណៈ បាននិយាយថា “ការបន្តបិទខ្ទប់នៅតែមានប្រសិទ្ធិភាព នៅគ្រប់ ២០ ស្រុកក្នុងតំបន់ ។ បម្រាមគោចរ នឹងនៅតែដាក់តឹងរ៉ឺង លើកលែងតែសេវាកម្មចាំបាច់មួយចំនួន ខណៈពេលដែលការជួបជុំ សម្រាប់ពិធីអាពាហ៍ពិពាហ៍ ត្រូវបានកាត់បន្ថយមកត្រឹម ២៥ នាក់ប៉ុណ្ណោះ” ។

កាលពីថ្ងៃទី ២៩ ខែមេសា រដ្ឋបាលរដ្ឋ​ Jammu និងតំបន់កាស្មៀរបានប្រកាសពី ការបិទខ្ទប់យ៉ាងតឹងរ៉ឹង ដោយមានតែសេវាកម្មចាំបាច់ដូចជា កន្លែងលក់អាហារ និងមន្ទីរពេទ្យប៉ុណ្ណោះ ដែលត្រូវបានអនុញ្ញាត ឲ្យធ្វើប្រតិបត្តិការ ។

គួរបញ្ជាក់ថា គិតត្រឹមពេលនេះ ប្រទេសឥណ្ឌា មានករណីឆ្លងជំងឺកូវីដ ១៩ ជាង ២២ លានករណី និងមានអ្នកស្លាប់ចំនួន ២៤៦,១៤៦ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មិនធម្មតា! ថ្នាំគ្រាប់ព្យាបាលកូវីដរបស់ឥណ្ឌា​ ក៏មានប្រសិទ្ធភាពខ្លាំងប្រឆាំងវីរុសបំប្លែងខ្លួនដែរ

ចុចអាន ៖ អីក៏វេទនាម្ល៉េះ! ឥណ្ឌា ផ្ទុះជំងឺសាហាវមួយទៀត អ្នកជាសះស្បើយពីកូវីដអាចពិការភ្នែក និងឈានដល់ស្លាប់