តិចអាក្រក់ដូចឥណ្ឌា! នេប៉ាល់ មានអ្នកស្លាប់ដោយកូវីដខ្ពស់បំផុតមិនធ្លាប់មានក្នុងរយៈពេល ២៤ ម៉ោងចុងក្រោយ

ប្រទេសនេប៉ាល់ កាលពីថ្ងៃចន្ទ បានរាយការណ៍ថា មានមនុស្សស្លាប់ ដោយសារជំងឺកូវីដ ១៩ ចំនួន ១៣៩ នាក់ ដែលជាចំនួនស្លាប់ ខ្ពស់បំផុតមិនធ្លាប់មាន នៅក្នុងប្រទេស និងមានអ្នកឆ្លងថ្មីចំនួន ៩,១២៧ ករណី ហើយវាក៏ជាថ្ងៃទី ៦ ជាប់ៗគ្នាផងដែរ ដែលប្រទេសនេះមានករណីថ្មីជាង ៨,០០០ ករណីក្នុងមួយថ្ងៃ ។

នេះជាលើកទីមួយហើយ ដែលអ្នកជំងឺជាង ១០០ នាក់ ត្រូវបានបញ្ជាក់ថា បានស្លាប់ក្នុងពេលតែមួយ នៅក្នុងប្រទេសនេប៉ាល់ ចាប់តាំងពីប្រទេសនេះ ត្រូវបានរងគ្រោះ ដោយរោគរាតត្បាតដំបូងកាលពីឆ្នាំមុន ។

លោក Sameer Adhikari អ្នកនាំពាក្យក្រសួងបានប្រាប់សារព័ត៌មាន ស៊ីនហួ ថា “ខ្ញុំមិនអាចនិយាយថាតើ ពួកគេទាំងអស់បានស្លាប់ ក្នុងរយៈពេល ២៤ ម៉ោងចុងក្រោយនេះ ឬក៏យ៉ាងណានោះទេ ។ នេះគឺជាតួលេខនៃការស្លាប់ ដែលត្រូវបានរាយការណ៍ ក្នុងរយៈពេល ២៤ ម៉ោងចុងក្រោយ” ។

ចំនួនអ្នកស្លាប់ បានកើនឡើង នៅពេលដែលមន្ទីរពេទ្យ កំពុងត្អូញត្អែរអំពីកង្វះអុកស៊ីសែន និងគ្រែអ្នកជំងឺ ។ មន្ទីរពេទ្យជាច្រើន នៅក្នុងប្រទេស បានបញ្ឈប់ការទទួលយកអ្នកជំងឺកូវីដ ១៩ ថ្មី ខណៈដែលប្រព័ន្ធផ្សព្វផ្សាយសង្គម កំពុងស្វែងរកការអំពាវនាវសុំជំនួយ អុកស៊ីសែន និងគ្រែ សម្រាប់មណ្ឌលថែទាំអ្នកជំងឺ ។

ទន្ទឹមនោះ លោក Adhikari បាននិយាយថា “កង្វះអុកស៊ីសែន ក៏អាចរួមចំណែក ដល់ការកើនឡើងនៃការស្លាប់នេះផងដែរ” ។

គួរបញ្ជាក់ថា គិតត្រឹមពេលនេះ ប្រទេសនេប៉ាល់ មានករណីឆ្លងជំងឺកូវីដ ១៩ សរុប ៤០៣,៧៩៤ និងមានអ្នកស្លាប់ចំនួន ៣,៨៥៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ នេប៉ាល់​ បារម្ភ​ផ្ទុះ​កូវីដ​អាក្រក់​​ដូច​ឥណ្ឌា​ ខណៈ​មេដឹក​នាំ​​ជឿ​វិធី​ព្យាបាល​ហួស​ចិត្ត

ចុចអាន ៖ ទើប​តែ​បារម្ភ​ផ្ទុះ​ខ្លាំង​​ ឥឡូវ​នេប៉ាល់​ចាប់​ផ្តើម​ខ្វះគ្រែ​ និង​អ៊ុក​ស៊ីសែន​​