រវល់តែពី ឥណ្ឌា ងាកមក ប្រេស៊ីល ពេលនេះមានអ្នកស្លាប់ដោយកូវីដជាង ៤២៥,៥០០ នាក់ហើយ

ចំនួនអ្នកស្លាប់ ដោយសារជំងឺកូវីដ ១៩ នៅប្រទេសប្រេស៊ីល បានកើនឡើងដល់ ៤២៥,៥៤០ នាក់ហើយ កាលពីថ្ងៃអង្គារ បន្ទាប់ពីក្រសួងសុខាភិបាល បានរាយការណ៍ថា មានមនុស្សស្លាប់ចំនួន ២,៣១១ នាក់បន្ថែមទៀត ពីរោគរាតត្បាតមួយនេះ ក្នុងរយៈពេលមួយថ្ងៃ ។

ទន្ទឹមនោះ ក្នុងរយៈពេល ២៤ ម៉ោងចុងក្រោយ ប្រទេសប្រេស៊ីល ក៏បានរកឃើញករណីឆ្លងថ្មីចំនួន ៧២,៧១៥ ករណីផងដែរ ។ ចាប់តាំងពីករណីដំបូង របស់ប្រទេសនេះ ត្រូវបានរកឃើញនៅថ្ងៃទី ២៦ ខែកុម្ភៈ ឆ្នាំ ២០២០ មនុស្ស ១៥,២៨២,៧០៥ នាក់ នៅក្នុងប្រទេសប្រេស៊ីល បានធ្វើតេស្តរកវីរុសនេះ ។

ប្រទេសប្រេស៊ីល មានចំនួនអ្នកស្លាប់ ដោយសារជំងឺកូវីដ ១៩ ខ្ពស់បំផុតទី ២ លើពិភពលោក បន្ទាប់ពីសហរដ្ឋអាមេរិក ។ ប្រទេសនេះ ក៏កំពុងប្រឈមនឹង រលកឆ្លងថ្មីនៃការឆ្លងជំងឺកូវីដ ១៩ ដែលបណ្តាលឲ្យមានការកើនឡើងនូវករណីឆ្លង និងការស្លាប់ ក៏ដូចជាការដួលរលំនៃមន្ទីរពេទ្យ ដែលមិនអាចដោះស្រាយ នូវការកើនឡើងនៃអ្នកជំងឺបាន ។

គិតត្រឹមថ្ងៃចន្ទ ប្រទេសប្រេស៊ីល បានចាក់វ៉ាក់សាំងការពារជំងឺកូវីដ ១៩ ចំនួន ៥៣.៩ លាននាក់ហើយ ក្នុងនោះអ្នកចាក់ដូសដំបូងមានចំនួន ៥៣.៩ លាននាក់ ពោលស្មើនឹង ១៦.៩៦ ភាគរយនៃចំនួនប្រជាជន ខណៈអ្នកចាក់ពេញ ២ ដូសមានចំនួន ១៨ លាននាក់ ស្មើនឹង ៨.៥៤ ភាគរយនៃចំនួនប្រជាជន ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ប្រធានាធិបតី ប្រេស៊ីល ជិះម៉ូតូពេញក្រុង ជាមួយហ្វូងមនុស្សទាំងមិនពាក់ម៉ាស់យ៉ាងរំភើយ (មានវីដេអូ)

ចុចអាន ៖ ប្រេស៊ីល ត្រៀមផលិតវ៉ាក់សាំងរុស្ស៊ី Sputnik V ដោយគ្មានការយល់ព្រមពីនិយតករ