ការស្លាប់ដោយសារកូវីដនៅឥណ្ឌាបំបែកកំណត់ត្រាថ្មីទៀត ធ្វើឲ្យចំនួនសរុបកើនលើស ២៥ម៉ឺននាក់

ទិន្នន័យផ្លូវការបានបង្ហាញថា ចំនួនអ្នកស្លាប់ដោយសារជំងឺកូវីដ-១៩នៅក្នុងប្រទេសឥណ្ឌា បានកើនលើស ២៥០,០០០ នាក់ហើយ គិតត្រឹមថ្ងៃពុធទី១២ខែឧសភានេះ ខណៈជំងឺរាតត្បាត កំពុងរីករាលដាលពាសពេញប្រទេសដែលមានប្រជាជន១.៣ពាន់លាននាក់មួយនេះ។

យោងតាមក្រសួងសុខាភិបាលបានឲ្យដឹងថា មនុស្សចំនួន ៤,២០៥នាក់បានស្លាប់ក្នុងរយៈពេល២៤ម៉ោងចុងក្រោយ ដែលនេះជាចំនួនកំណត់ត្រាថ្មី ហើយនាំឲ្យចំនួនអ្នកស្លាប់សរុបកើនដល់ ២៥៤,១៩៧នាក់។

ស្របពេលជាមួយគ្នានេះដែរ ការឆ្លងថ្មីមានជិត៣៥០,០០០ករណី ធ្វើឲ្យករណីសរុបកើនដល់ ២៣.៣លានករណី ដែលជាកម្រិតខ្ពស់បំផុតលំដាប់ទី២បន្ទាប់ពីសហរដ្ឋអាមេរិក។

ថ្វីបើជំងឺរាតត្បាតហាក់ដូចជាបង្ហាញសញ្ញាថមថយនៅតាមទីក្រុងធំៗក៏ដោយ ប៉ុន្តែវីរុសកូវីដ-១៩ហាក់ដូចជាកំពុងរីករាលដាលពាសពេញតំបន់ជនបទដាច់ស្រយាល ដែលជាកន្លែងមានប្រជាជន២ភាគ៣រស់នៅ។

អ្នកជំនាញជាច្រើនជឿថា ចំនួនមនុស្សផ្លូវការដែលបានស្លាប់នៅក្នុងប្រទេសឥណ្ឌា គឺមិនអាចប៉ាន់ស្មានបានទេ៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ សពអ្នកស្លាប់ដោយសារកូវីដកាន់តែច្រើន ត្រូវបានដឹកទាំងឡានៗ យកទៅទម្លាក់ពីលើស្ពានចូលទន្លេ គង្គា