កូវីដ-១៩

ចម្លែកណាស់ ឥណ្ឌាលេចចេញជំងឺផ្សិតខ្មៅ៥០ករណីលើអ្នកជំងឺកូវីដ-១៩

បានផុស

៤ years មុន

នៅ

ថ្ងៃព្រហស្បតិ៍ ១៣ ឧសភា ២០២១

ដោយ

អាជ្ញាធរនៅរដ្ឋ Madhya Pradesh ភាគកណ្តាលប្រទេសឥណ្ឌាបាននិយាយនៅថ្ងៃពុធថា ជំងឺពពួកផ្សិតខ្មៅចំនួន៥០ករណីដែលគេស្គាល់ Mucormycosis ត្រូវបានរកឃើញក្នុងចំណោមអ្នកជំងឺកូវីដ-១៩។

ព័ត៌មានត្រូវបានបង្ហាញដោយអភិបាលរដ្ឋ Madhya Pradesh លោក Shivraj Singh Chouhan កំឡុងពេលសន្និសីទកាសែតមួយ បន្ទាប់ពីកិច្ចប្រជុំជាន់ខ្ពស់មួយ។

កិច្ចប្រជុំនេះត្រូវបានធ្វើនៅសណ្ឋាគារ Bhopal ក្នុងរដ្ឋធានី Madhya Pradesh ជុំវិញបញ្ហាប្រឈមថ្មីដោយអ្នកជំងឺកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលរដ្ឋលោក Chouhan បាននិយាយថា ៖«ករណីជំងឺផ្សិតខ្មៅត្រូវបានរកឃើញ ហើយនេះជាក្តីកង្វល់ថ្មីមួយរបស់ខ្ញុំឥឡូវនេះ។ រហូតដល់ពេលនេះ ជំងឺផ្សិតខ្មៅមានចំនួន៥០ករណីត្រូវបានរាយការណ៍ទូទាំងរដ្ឋ»។

អាជ្ញាធររដ្ឋនឹងដាក់ចេញនូវពិធីសារលំអិតចំពោះករណីជំងឺផ្សិតខ្មៅ ហើយការព្យាបាលនឹងត្រូវបានអនុវត្តទៅតាមនោះ។

អ្នកជំងឺដែលទទួលរងពីជំងឺឆ្លងផ្សិតខ្មៅមានរោគសញ្ញាហៀរសំបោ ហូរឈាមតាមច្រមុះ ហើមភ្នែក ឈឺចាប់ភ្នែក ធ្លាក់ត្របកភ្នែក ស្រវាំងភ្នែក រហូតដល់ងងឹតភ្នែកមើលអ្វីលែងឃើញ។

លោក Chouhan មានប្រសាសន៍ថា ៖«រដ្ឋាភិបាលនឹងបន្តការព្យាបាលតាមជម្រើសដែលមន្ទីរពេទ្យអាចធ្វើទៅបាន និងការព្យាបាលដោយឥតគិតថ្លៃដល់អ្នកជំងឺខ្សត់ខ្សោយថវិកា»។

អ្នកជំនាញសុខភាពនិយាយថា វាប៉ះពាល់ដល់ប្រហោងឆ្អឹង ខួរក្បាល និងសួត ហើយអាចប៉ះពាល់ដល់អាយុជីវិតទៀតផង ឬហានិភ័យខ្ពស់ដល់បុគ្គលដែលមានភាពស៊ាំខ្សោយធ្ងន់ធ្ងរ ដូចជាអ្នកជំងឺមហារីក ឬអ្នកជំងឺអេដស៍ជាដើម។

ប្រទេសឥណ្ឌាបានកំពុងទទួលរងការរាតត្បាតពីកូវីដ-១៩រលកទី២ធ្ងន់ធ្ងរបំផុត។ ក្រសួងសុខាភិបាលបានបង្ហាញទិន្នន័យនៅថ្ងៃពុធថា ករណីឆ្លងកូវីដ-១៩ថ្មីចំនួន ៣៤៨ ៤២១នាក់ និងស្លាប់ថ្មី៤២០៥នាក់ក្នុងរយៈពេល២៤ម៉ោងចុងក្រោយ៕

ប្រែសម្រួល៖ វីរបុត្រ
ប្រភព៖ xinhuanet