មិនធម្មតា! វ៉ាក់សាំង Sinovac ជួយទីក្រុងមួយរបស់ ប្រេស៊ីល ជួបជុំគ្នាដោយមិនចាំបាច់ពាក់ម៉ាស ក្រោយចាក់ពេញ ២ ដូស

វ៉ាក់សាំង CoronaVac ដែលត្រូវបានបង្កើតឡើង ដោយក្រុមហ៊ុន Sinovac Biotech របស់ប្រទេសចិន បានធ្វើឲ្យទីក្រុងមួយ របស់ប្រទេសប្រេស៊ីល ជួបជុំគ្នាដោយមិនចាំបាច់ពាក់ម៉ាស និងបង្កើតជាទីកន្លែង ដោយមិនភ័យខ្លាច សម្រាប់រោគរាតត្បាត ចំពេលមានការរីករាលដាល នៃជំងឺកូវីដ ១៩ ។ នេះបើយោងតាម សារព័ត៌មានជប៉ុន បានរាយការណ៍ ។

សារព័ត៌មាន Nikkei Asia បានរាយការណ៍ថា នៅក្នុងទីក្រុង Serrana ដែលធ្វើដំណើរ ចម្ងាយប្រហែល ៤ ម៉ោងពីទីក្រុង Sao Paulo យុទ្ធនាការចាក់វ៉ាក់សាំង ដែលគេស្គាល់ថា “Project S” បានទទួលជោគជ័យ ៩៧.៧ ភាគរយ នៃប្រជាជនពេញវ័យរបស់ខ្លួន ដោយការចាក់វ៉ាក់សាំង ដែលផលិតដោយប្រទេសចិន ។

ទីក្រុង Serrana ទទួលរងការប៉ះពាល់យ៉ាងខ្លាំង ពីរលកឆ្លងដំបូងនៅក្នុងប្រទេសប្រេស៊ីលកាលពីឆ្នាំមុន ។ ទីក្រុងនេះបាននិយាយថា “សូមអរគុណ ចំពោះវ៉ាក់សាំងនេះ ប្រជាជននៅក្នុងទីក្រុង បច្ចុប្បន្នអាចជជែកគ្នាលេង ដោយរីករាយនៅលើកៅអីអង្គុយ ដោយគ្មានពាក់ម៉ាស” ។

ចំណែក យុទ្ធនាការចាក់វ៉ាក់សាំង របស់រដ្ឋាភិបាលរដ្ឋ Sao Paulo ត្រូវបានចាប់ផ្ដើមក្នុងខែកុម្ភៈ ហើយអ្នកចូលរួមចុងក្រោយ បានទទួលការចាក់ដូសទី ២ នៅថ្ងៃទី ១១ ខែមេសា ។

គេហទំព័រព័ត៌មានជប៉ុន បានរាយការណ៍ទៀតថា គម្រោងវ៉ា់ក់សាំងរបស់ចិន កំពុងបង្ហាញពីអនាគត និងក្ដីសង្ឃឹម សម្រាប់ប្រទេសកំពុងអភិវឌ្ឍន៍ ពាក់ព័ន្ធនឹងការទទួលបានវ៉ាក់សាំង ការពារជំងឺកូវីដ ១៩ ។

ទន្ទឹមនោះ លោក Laudair Anulai អាយុ ៤៧ ឆ្នាំ ដែលចូលរួមជជែកគ្នានៅទីក្រុង Serrana បាននិយាយថា “ខ្ញុំរីករាយដែលខ្ញុំបានចាក់វ៉ាក់សាំងនេះ ។ ឥឡូវនេះ ខ្ញុំមិនចាំបាច់ខ្លាចជំងឺកូវីដ ១៩ ទៀតនោះទេ” ។

គួរបញ្ជាក់ថា គិតត្រឹមពេលនេះ ប្រទេសប្រេស៊ីល មានករណីឆ្លងជំងឺកូវីដ ១៩ ជាង ១៥ លានករណី និងមានអ្នកស្លាប់ជិត ៤៣ ម៉ឺននាក់ ខណៈមានអ្នកជាសះស្បើយជិត ១៤ លាននាក់ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ឥណ្ឌូណេស៊ី សរសើរមិនដាច់ពីមាត់ វ៉ាក់សាំង Sinovac ការពារការស្លាប់១០០ភាគរយ និងការឆ្លង ៩៤ ភាគរយ

ចុចអាន ៖ ក្រោយ WHO ទទួលស្គាល់វ៉ាក់សាំង Sinopharm ឲ្យប្រើប្រាស់ជាផ្លូវការ ចិន ត្រៀមផ្ដល់ ១០ លានដូសទៅគម្រោង COVAX