រដ្ឋបាលខេត្តស្វាយរៀង ប្រកាសរកឃើញកម្មកររោងចក្រឆ្លងកូវីដ-១៩ មានអ្នកប៉ះពាល់ជាង ២០០នាក់

ស្វាយរៀង៖ សេចក្ដីជូនដំណឹងរដ្ឋបាលខេត្តស្វាយរៀង បានចេញសេចក្ដីជូនដំណឹងថា អ្នកជំងឺកូវីដ១៩ម្នាក់ ជាកម្មកររោងចក្រ បានមានអ្នកប៉ះពាល់ជាង២០០នាក់។

រដ្ឋបាលខេត្តស្វាយរៀង បានបង្ហាញដោយយោងតាមសេចក្ដីជូនព័ត៌មានរបស់ក្រសួងសុខាភិបាលចេញថ្ងៃទី១៣ ខែឧសភា ឆ្នាំ២០២១ ស្ដីពីករណីវិជ្ជមានកូវី-១៩ លើបុរសជនជាតិខ្មែរចំនួន១នាក់ ឈ្មោះ ណេ ពិសី អាយុ៤០ឆ្នាំ រស់នៅភូមិស្រម៉ ឃុំបុសមន ស្រុករំដួល មានមុខរបរជាកម្មកររោងចក្រ មួយកន្លែងស្ថិតនៅតំបន់ SEZ មេនហាធេន ក្រុងបាវិត។

ដោយនៅថ្ងៃទី១២ ខែឧសភា ឆ្នាំ២០២១ បុរសនោះមានអាការមិនស្រួលខ្លួនបានធ្វើដំណើរទៅមន្ទីរពេទ្យបង្អែកខេត្ត ដើម្បីពិនិត្យនិងព្យាបាលជំងឺ ដោយមានអាការសង្ស័យចូលក្នុងនិយមន័យកូវីដ-១៩ ក្រុមគ្រូពេទ្យបានយកវត្ថុវិភាគសំណាកដើម្បីធ្វើតេស្ត “លទ្ធផលវិជ្ជមានកូវីត-១៩” ។

ចំពោះអ្នកប៉ះពាល់មានចំនួន២០៦នាក់ ក្រុមការងារបានយកវត្ថុវិភាគសំណាកធ្វើតេស្ត នឹងដាក់ឲ្យធ្វើចត្តាឡីស័កដើម្បីតាមដានសុខភាព។ បច្ចុប្បន្នអ្នកជំងឺកូវីដ-១៩ខាងលើនេះ ត្រូវបានបញ្ជូនទៅព្យាបាលនៅមន្ទីរពេទ្យបង្អែកសាមគ្គីរំដួល។

រដ្ឋបាលខេត្តស្វាយរៀង អំពាវនាវដល់អ្នកដែលបានប៉ះពាល់ផ្ទាល់ ឬប្រយោល ជាមួយអ្នកកូវីដ-១៩ ខាងលើ គិតចាប់ពីថ្ងៃទី២៩ ខែមេសា ឆ្នាំ២០២១ ត្រូវធ្វើចត្តាឡីស័កនៅតាមផ្ទះរយៈពេល១៤ថ្ងៃ ដើម្បីតាមដានសុខភាពប្រសិនបើមានអាការខុសប្រក្រតីដូចជា: ក្ដៅខ្លួន ក្អក កណ្ដាស់ ឈឺបំពង់ក ពិបាកដកដង្ហើម សូមផ្ដល់ព័ត៌មានទៅអាជ្ញាធរមូលដ្ឋាន និងរួសរាន់ទៅយកវត្ថុវិភាគសំណាក ឬទាក់ទងទៅកាន់លេខទូរស័ព្ទ ០៩៧ ៥០៣ ៤៥៦៧ / ០៤៤ ៧១២ ៥២២៕

អត្ថនទ៖ ភក្ដី