ខេត្តកំពង់ចាមមានអ្នកជាសះស្បើយពីជំងឺកូវីដ១៩ចំនួន៣០នាក់នៅថ្ងៃនេះ

កំពង់ចាម៖ អ្នកជំងឺកូវីដ១៩ដែលកំពុងសម្រាកនៅក្នុងមន្ទីរពេទ្យមេគង្គ ខេត្តកំពង់ចាម   នៅថ្ងៃទី១៥  ខែឧសភានេះ មានអ្នកជំងឺកូវីដ១៩ចំនួន៣០នាក់បានជាសះស្បើយ និងត្រូវបានអនុញ្ញាតឱ្យត្រឡប់ទៅកាន់លំនៅដ្ឋានរៀងៗខ្លួន តែត្រូវបន្តធ្វើចត្តាឡីស័ករយ:ពេលពីរសប្តាហ៍នៅតាមផ្ទះបន្ថែមទៀត។

យោងតាមរបាយការណ៍ នៃមន្ទីរសុខាភិបាលខេត្តកំពង់ចាម បានឱ្យដឹងនៅថ្ងៃទី១៥  ឧសភាថា អ្នកជំងឺដែលបានជាសះស្បើយទាំង៣០នាក់ មានអ្នករស់នៅស្រុកកងមាសចំនួន១៣ នាក់ ស្រុកកំពង់សៀមចំនួន២នាក់ ស្រុកបាធាយចំនួន៤នាក់ ស្រុកស្រីសន្ធរចំនួន៧នាក់ និងស្រុកចម្ការលើចំនួន៤នាក់។ ក្នុងនោះមានកុមារអាយុក្រោម១៨ឆ្នាំចំនួន៤នាក់ កុមារីចំនួន២នាក់។

ថ្ងៃនេះជាលើកដំបូងដែលមានអ្នកជំងឺកូវីដ១៩បានជាសះស្បើយទ្រង់ទ្រាយធំបែបនេះ ដោយ សារតែមានការយកចិត្តទុកដាក់ ជាមួយនឹងការខិតខំប្រឹងប្រែងយ៉ាងសស្រាក់សស្រាំទាំងយប់ទាំងថ្ងៃរបស់ក្រុមគ្រូពេទ្យជំនាញជួរមុខ។

គួរបញ្ជាក់ថា គិតត្រឹមថ្ងៃទី១៤ ឧសភា ខេត្តកំពង់ចាមមានអ្នកជំងឺកូវីដ១៩ក្នុងព្រឹត្តិការណ៍ សហគមន៍២០កុម្ភ:សរុបចំនួន២០០នាក់ មានអ្នកជាសះស្បើយចំនួន៧៧នាក់ និងមានអ្នកស្លាប់ចំនួន២នាក់៕ 

អត្ថបទ  និង  រូបភាព៖ ហុង  ម៉េងហៀ