វៀតណាម ចង់ទិញវ៉ាក់សាំង តែ Pfizer-BioNTech ហាមផ្តាច់ មិនឲ្យតថ្លៃ

រដ្ឋាភិបាលវៀតណាម កំពុងពិចារណាលើការទិញវ៉ាក់សាំងកូវីដ Pfizer-BioNTech ខណៈក្រុមហ៊ុនផលិត បានបដិសេធលើការតថ្លៃ។

លោកនាយករដ្ឋមន្រ្តី Pham Minh Chinh បាននិយាយកាលពីថ្ងៃចន្ទថា សមាជិករដ្ឋាភិបាលដែលត្រូវបានជ្រើសរើស នឹងត្រូវចូលរួមផ្តល់យោបល់លើកិច្ចព្រមព្រៀងមួយ ដើម្បីរកដំណោះស្រាយឲ្យប្រទេសវៀតណាមទទួលបានវ៉ាក់សាំង ដែលត្រូវបានអភិវឌ្ឍដោយក្រុមហ៊ុនមានមូលដ្ឋាននៅសហរដ្ឋអាមេរិកឈ្មោះ Pfizer និងក្រុមហ៊ុន BioNTech របស់អាល្លឺម៉ង់។

ក្រៅពីការិយាល័យរដ្ឋាភិបាល ក្រសួងសុខាភិបាល ក្រសួងផែនការនិងវិនិយោគនិងក្រសួងយុត្តិធម៌ នឹងត្រូវផ្តល់យោបល់លើបញ្ហានេះ។

ប៉ុន្តែរដ្ឋមន្រ្តីក្រសួងសុខាភិបាលលោក Nguyen Thanh Long បាននិយាយកាលពីថ្ងៃចន្ទថា ​“ក្រុមហ៊ុន Pfizer មិនយល់ព្រមចរចាលើតម្លៃ និងលក្ខខណ្ឌផ្សេងទៀតនៃកិច្ចសន្យាទេ ហើយប្រទេសវៀតណាមត្រូវឆ្លើយតបទៅក្រុមហ៊ុន Pfizer វិញមិនឲ្យលើសពីថ្ងៃអង្គារឡើយ”។

យ៉ាងណាក្តី តម្លៃនៃកិច្ចព្រមព្រៀងនេះ មិនទាន់ត្រូវបានបង្ហើបឲ្យដឹងឡើយ នៅពេលនេះទេ។

លោកនាយករដ្ឋមន្រ្តី Chinh និយាយថា ការទិញវ៉ាក់សាំងកូវីដ គឺជារឿងចាំបាច់និងបន្ទាន់ ហើយក្រសួងសុខាភិបាលទទួលបន្ទុកក្នុងការជ្រើសរើស ថាតើវ៉ាក់សាំងប្រភេទណាដែលវៀតណាមនឹងទិញ៕

ប្រែសម្រួលដោយ៖ Vann Vann

ប្រភព៖ VN Express

ចុចអាន៖ ឈីលី សរសើរវ៉ាក់សាំង Sinovac របស់ចិន ថា មានប្រសិទ្ធភាពអស្ចារ្យ!