កូវីដ-១៩

មន្ត្រីស្ថានទូតអាមេរិក និយាយជុំវិញប្រភេទវ៉ាក់សាំងកូវីដ-១៩ ដែលកម្ពុជានឹងទទួលជាបន្ត

បានផុស

៤ years មុន

នៅ

ថ្ងៃពុធ ១៩ ឧសភា ២០២១

ដោយ

មន្ត្រីស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជាបានប្រយលថា កម្ពុជាទំនងជានឹងទទួលបាននូវជំនួយវ៉ាក់សាំងបង្ការជំងឺកូវីដ-១៩ ប្រភេទ AstraZeneca នៅចុងខែឧសភា នាពេលខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chad Roedemeier មន្ត្រីអ្នកនាំពាក្យនៃស្ថានទូតសហរដ្ឋអាមេរិកប្រចាំព្រះរាជាណាចក្រកម្ពុជា បានប្រាប់ កម្ពុជាថ្មី នៅរសៀលថ្ងៃទី១៩ ខែឧសភា ឆ្នាំ២០២១នេះថា ប្រទេសកម្ពុជាបានទទួលការចាក់វ៉ាក់សាំង AstraZeneca ចំនួន ៣២៤,០០០ រួចទៅហើយពីយន្តការកូវ៉ាក COVAX។

លោកលើកឡើងបន្ថែមថា៖ “WHO (អង្គការសុខភាពពិភពលោក) និយាយថា ប្រទេសកម្ពុជានឹងទទួលបានវ៉ាក់់សាំងកូវីដ-១៩ ចំនួន ៧៧៦,០០០ដូសបន្ថែមទៀត ពី COVAX នៅចុងខែឧសភា។ ខ្ញុំមិនច្បាស់អំពីកាលបរិច្ឆេទ ឬវ៉ាក់សាំងប្រភេទណាទេ ដោយអាស្រ័យទៅលើការយល់ព្រមពី WHO ដែលនឹងផ្ដល់វ៉ាក់សាំងកូវីដ-១៩សរុបស្មើនឹងចំនួន ១,១លានដូស”។

លោក Chad Roedemeier បានបញ្ជាក់បន្តថា អង្គការសុខភាពពិភពលោកនិយាយថា ប្រទេសកម្ពុជាអាចរំពឹងនឹងទទួលបានវ៉ាក់សាំងកូវីដ-១៩ ចំនួន ៧លានដូស សរុបពីយន្តការ COVAX ដោយផ្ដល់ជាបន្តទៀតរហូតដល់ពេញមួយឆ្នាំ។

គួរបញ្ជាក់ថា តាមរយៈគេហទំព័រផ្លូវការរបស់ស្ថានទូតសហរដ្ឋអាមេរិកប្រចាំនៅកម្ពុជា ម្សិលមិញ បានលើកឡើងថា សហរដ្ឋអាមេរិកគឺជាដៃគូរឹងមាំជាប់លាប់មួយរបស់ប្រទេសកម្ពុជា នៅក្នុងអំឡុងពេលនៃការរាតត្បាតជាសាកលនៃមេរោគ ដោយបានផ្តល់ថវិកាចំនួនជាង ១១ លានដុល្លារ ជាជំនួយផ្តល់ឱ្យដោយផ្ទាល់ ទាក់ទងនឹងជំងឺកូវីដ-១៩ ជំនួយបច្ចេកទេសសំខាន់ៗ ជាបន្ថែមលើកម្មវិធីសហការជាដៃគូជាយូរមកក្នុងផ្នែកសុខាភិបាល និងបានផ្តល់ថវិកាចំនួនជាង ៤ពាន់លានដុល្លារ ដែលជាចំនួនផ្តល់ឱ្យលើសប្រទេសណាទាំងអស់ដល់យន្តការកូវ៉ាក របស់អង្គការសុខភាពពិភពលោក ដែលតាមរយៈកម្មវិធីនេះ ប្រទេសកម្ពុជានឹងទទួលបានវ៉ាក់សាំងចំនួន ១លាន១សែនដូស នៅត្រឹមដំណាច់ខែឧសភានេះ ហើយនឹងមានមកថែមទៀត៕

អត្ថបទ៖ ច័ន្ទ វីរៈ