កូវីដ-១៩

អភិបាលខេត្តកំពង់ចាម ៖ មកដល់ថ្ងៃនេះ អ្នកឆ្លងកូវីដនៅខេត្តកំពង់ចាមបានហក់ឡើងជាង៣០០នាក់ហើយ

បានផុស

៣ years មុន

នៅ

ថ្ងៃព្រហស្បតិ៍ ២០ ឧសភា ២០២១

ដោយ

ភ្នំពេញ ៖ លោក អ៊ុន ចាន់ដា អភិបាលនៃគណអភិបាលខេត្តកំពង់ចាម បានឲ្យដឹងថា មកដល់ថ្ងៃនេះ តួលេខ អ្នកជំងឺកូវីដ ១៩ នៅខេត្តកំពង់ចាម បានឆ្លងក្នុងព្រឹត្តិការណ៍សហគមន៍ ២០ កុម្ភៈ បានហក់ឡើង ចំនួន ៣០៧នាក់ ដែលជាតួលេខខ្ពស់ និងគួរឲ្យព្រួយបារម្ភ។

លោកអភិបាលខេត្តបានបន្តថា ការហក់ឡើងនៃចំនួនអ្នកឆ្លងកូវីដ ១៩នេះបន្ទាប់ពីបានរកឃើញករណីវិជ្ជមានកូវីដ-១៩ ចំនួន ៥២នាក់ថ្មីក្នុងនោះមានកម្មការិនី ចំនួន ៥១នាក់កាលពីថ្ងៃទី ១៩ ឧសភា កន្លងទៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីជួបសំណេះសំណាល និងចុះសួរសុខទុក្ខក្រុមគ្រូពេទ្យកងយោធពលខេមរភូមិន្ទចាក់វ៉ាក់សាំងកូវីដ-១៩នៅមន្ទីរពេទ្យយោធភូមិភាគទី២នៅថ្ងៃទី២០ឧសភានេះ លោកអភិបាលខេត្តបានបន្ថែមថា«នៅចំពោះមុខ យើងបាននឹងកំពុងស្វែងរក អ្នកប៉ះពាល់ផ្ទាល់ ជាមួយនឹងអ្នកជំងឺចំនួន៥២នាក់ នេះបន្តទៀត ដើម្បីយកសំណាកពួកគាត់ មកធ្វើតេស្តរហ័ស ដើម្បី បញ្ជៀសកុំឱ្យចម្លង ចូលដល់ក្នុងសហគមន៍ ជាបន្តទៀត»។

លោកអភិបាលខេត្តបានឲ្យដឹងទៀតថា ជាក់ស្ដែង មកដល់ពេលនេះ យើងបានចាត់វិធានការ បិទផ្អាកផលិតកម្ម ជាបណ្តោះអាសន្ននូវសកម្មភាពផលិតកម្មរបស់រោងចក្រកាត់ដេរ ចំនួន ០៤កន្លែង ដែលកំពុងប៉ះពាល់នឹងករណីកូវីដ-១៩រួចហើយដើម្បីទប់ស្កាត់ការឆ្លងរាលដាលទៅកន្លែងផ្សេងទៀត។

ទាក់ទិននឹងមន្ទីរពេទ្យយោធភូមិភាគទី២នេះដែរ លោកអភិបាលខេត្តក៏បានចាត់ទុកមន្ទីរពេទ្យនេះបានដើរតួនាទីយ៉ាងសំខាន់ក្នុងការចូលរួមចំណែកលើកកំពង់វិស័យសុខាភិបាល និងបានជួយលើកកំពស់សុខុមាលភាពក្រុមគ្រួសារកងទ័ព ក៏ដូចជាប្រជាពលរដ្ឋទូទៅទាំងក្នុង និងក្រៅខេត្តកំពង់ចាមផងដែរ។

លោកអភិបាលខេត្តបានលើកទឹកចិត្ត ដល់ក្រុមគ្រូពេទ្យទាំងអស់ ត្រូវរួមសាមគ្គីគ្នា ដើម្បី កាត់ផ្តាច់ខ្សែចម្លងវីរុសកូវីដ ១៩ ខណៈដែល តួលេខអ្នកជំងឺនៅក្នុងខេត្តកំពង់ចាម បន្តហក់ឡើងខ្ពស់ គួរឲ្យព្រួយបារម្ភនោះ៕

ដោយ ៖ សំអឿន