កូវីដ-១៩

លឿនណាស់ ត្រឹម១សប្តាហ៍ វីរុសបំប្លែងខ្លួនឥណ្ឌាហក់ឡើង១៦០%នៅអង់គ្លេស

បានផុស

៤ years មុន

នៅ

ថ្ងៃសុក្រ ២១ ឧសភា ២០២១

ដោយ

ចំនួននៃករណីឆ្លងដែលត្រូវបានបញ្ជាក់នៅចក្រភពអង់គ្លេសដោយវីរុសបំប្លែងខ្លួនកូវីដ-១៩ដែលរកឃើញដំបូងនៅប្រទេសឥណ្ឌាបានហក់ឡើងជាង១៦០%កាលពីសប្តាហ៍មុន។ នេះបើតាមទិន្នន័យបានបង្ហាញ និងមានវីរុសបំប្លែងខ្លួនថ្មីមួយទៀតកំពុងត្រូវបានស៊ើបអង្កេត។

ទិន្នន័យពីសុខាភិបាលសាធារណៈអង់គ្លេស (PHE ) បង្ហាញថា មានករណីឆ្លងថ្មីនៃវីរុសបំប្លែកខ្លួន B.1.617.2 ចំនួន ៣៤២៤នាក់នៅចក្រភពអង់គ្លេសដែលបានហក់ឡើងយ៉ាងខ្លាំង បើធៀបទៅនឹងថ្ងៃព្រហស្បតិ៍កាលសប្តាហ៍មុនមានត្រឹម១៣១៣នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សុខាភិបាលសាធារណៈអង់គ្លេស និយាយថា ៖«ករណីនេះនៅតែមានឥទ្ធិពលខ្លាំងនៅភាគខាងជើង និងខាងលិចអង់គ្លេស ជាពិសេសនៅទីក្រុងបូលតុន និងឡុងដ៍ ប៉ុន្តែយើងក៏កំពុងឃើញចង្កោមឆ្លងរាលដាលទូទាំងប្រទេស»។

តូលេខនេះទំនងជាស្ថិតក្រោមការប៉ាន់ស្មាន ដោយសារការយឹតយាវពីការសំណាកកំពុងត្រូវបានប្រមូល និងវីរុសបំប្លែងខ្លួនដែលត្រូវបានធ្វើតេស្តវិជ្ជមានកំពុងត្រូវបានកំណត់នៅឡើយ។ PHE និយាយថា សំណាកភាគច្រើនពាក់ព័ន្ធនឹងកាលបរិច្ឆេទសរុបថ្មីដែលចន្លោះពី១០ទៅ១៤ថ្ងៃកន្លងទៅហើយ។

សាស្ត្រាចារ្យផ្នែកឱសថនៅសកលវិទ្យាល័យ University of East Anglia លោក Paul Hunter មានប្រសាសន៍ថា ៖«ការគណនាសមាមាត្រនៃសំណាកដែលត្រូវបានធ្វើបន្តបន្ទាប់គ្នា យើងទំនងជាមានជាង ១១០០០ករណី រហូតដល់ថ្ងៃទី១៥ ខែឧសភា ពីវីរុសបំប្លែងខ្លួនឥណ្ឌា»។

យោងតាម PHE បង្ហាញថា ភស្តុតាងបង្ហាញថា វីរុស B.1.617.2 ប្រហែលជាឆ្លងខ្លាំងជាវីរុសបំប្លែងខ្លួន Kent ដែលបានរកឃើញកាលពីឆ្នាំមុនដែលវាមានឥទ្ធិពលខ្លាំងនៅចក្រភពអង់គ្លេស។

នាយកប្រតិបត្តិទីភ្នាក់ងារសន្តិសុខសុខភាពចក្រភពលោក អ្នកស្រីវេជ្ជបណ្ឌិត Jenny Harries មានប្រសាសន៍ថា វាពិតជាសំខាន់ណាស់ដែលប្រជាជនមិនទាន់សប្បាយរីករាយខ្លាំង នៅពេលចក្រភពអង់គ្លេសចាប់ផ្តើមវិលទៅរកជីវិតរស់នៅប្រក្រតីវិញ។

អ្នកស្រីលើកឡើងថា ៖«ខណៈករណីវីរុស B.1.617.2 ចេះតែបន្តហក់ឡើង វាពិតជាចាំបាច់ណាស់ដែលប្រជាជនរស់នៅក្នុងតំបន់ដែលរាតត្បាតត្រូវតែចាក់វ៉ាក់សាំងឲ្យបានខ្ពស់។ វាជារបងការពារដ៏ល្អបំផុតដែលយើងទប់ស្កាត់ការរាលដាលជំងឺនេះ»។

ទន្ទឹមជាមួយគ្នានេះ វីរុសបំប្លែងខ្លួនកូរូណាផ្សេងទៀតត្រូវបានគេកំណត់ដោយដាក់ក្រោមការស៊ើបអង្កេត ដែលមានន័យថា វាគួរឲ្យបារម្ភពីសក្តានុពល និងទាមទារឲ្យធ្វើការស្រាវជ្រាវបន្ថែមទៀត។

ស្គាល់ថាជា VUI-21MAY-01 ឬហៅកាត់ថា AV.1 ជាវីរុសបំប្លែងខ្លួនដែលត្រូវបានរកឃើញនៅចក្រភពអង់គ្លេស ក្រិក និងឆាដ ហើយវាមិនច្បាស់ទេថា វីរុសនេះរកឃើញដំបូងនៅប្រទេសណា។ PHE និយាយថា រកឃើញ៤៩ករណីនៃវីរុសនេះនៅចក្រភពអង់គ្លេសរហូតដល់ពេលនេះ ដែលភាគច្រើននៅតំបន់ Yorkshire និង Humber។

PHE បានបន្ថែមថា គ្មានភស្តុងតាងណាដែលបញ្ជាក់ថា វ៉ាក់សាំងកូវីដគ្មានប្រសិទ្ធភាពការពារប្រជាជនប្រឆាំងនឹងជំងឺធ្ងន់ធ្ងរ និងករណីធ្ងន់ធ្ងរនៅមន្ទីរពេទ្យពីវីរុស B.1.617.2 ឬ AV.1 ឡើយ៕

ប្រែសម្រួល៖ វីរបុត្រ
ប្រភព៖ theguardian