ក្រោយបានធូរស្រាល! អឺរ៉ុប ឯកភាពគ្នាលើវិញ្ញាបនបត្រកូវីដ ដើម្បីសម្រួលការធ្វើដំណើរ និងងាយស្រួលកំណត់ស្ថានភាពជំងឺអ្នកទេសចរ

ស្ថាប័នសហភាពអ៊ឺរ៉ុប កាលពីថ្ងៃព្រហស្បតិ៍ បានឈានដល់កិច្ចព្រមព្រៀងនយោបាយ ស្តីពីវិញ្ញាបនប័ត្រឌីជីថលកូវីដ សម្រាប់ប្លុករបស់ខ្លួន ។

លោក Juan López Aguilar ប្រធានគណៈកម្មាធិការ សេរីភាពស៊ីវិលរបស់សភាអឺរ៉ុប បានប្រាប់សន្និសីទសារព័ត៌មានថា “យើងនឹងមិនធ្វើឲ្យមានសុបិន្តអាក្រក់ឡើងវិញ ដូចនៅរដូវក្តៅឆ្នាំ ២០២០ ឡើយ ។ តំបន់ធ្វើដំណើរដោយសេរីនៅសហភាពអឺរ៉ុប Schengen នឹងដំណើរការពេញលេញ” ។

បន្ទាប់ពីការចរចាជាច្រើនលើករួចមក សភាអឺរ៉ុប និងក្រុមប្រឹក្សាសហគមន៍អឺរ៉ុប បានឯកភាពគ្នាលើវិញ្ញាបនប័ត្រកូវីដ ។

ឯកសារដែលត្រូវបានស្នើឡើងនៅក្នុងខែមីនា ដោយគណៈកម្មការអឺរ៉ុប មានគោលបំណងដើម្បីសម្រួលដល់ការធ្វើដំណើរនៅក្នុងប្លុករបស់ខ្លួន ដោយលើកលែងការធ្វើចត្តាឡីស័ក ឬតម្រូវការធ្វើតេស្តសម្រាប់អ្នកដែលកាន់លិខិតឆ្លងដែន ។

វិញ្ញាបនប័ត្រកូវីដអ៊ឺរ៉ុប អាចធ្វើទៅបានសម្រាប់ពលរដ្ឋ និងអ្នករស់នៅសហភាពអឺរ៉ុបទាំងអស់ ដោយឥតគិតថ្លៃ សម្រាប់អ្នកដែលត្រូវបានចាក់វ៉ាក់សាំងហើយ ការធ្វើតេស្ត PCR អវិជ្ជមាន ឬបានជាសះស្បើយពីជំងឺកូវីដ ។

ទន្ទឹមនោះ ឯកសារនេះក៏នឹងអាចចូលមើលបានតាមស្មាតហ្វូន ឬទម្រង់ក្រដាស ហើយក៏នឹងមាន QR code ដែលអនុញ្ញាតឲ្យអាជ្ញាធរកំណត់ស្ថានភាព ជំងឺកូវីដរបស់អ្នកដំណើរ ផងដែរ ។

បច្ចុប្បន្នសភាអ៊ឺរ៉ុប និងរដ្ឋាភិបាលអ៊ឺរ៉ុប មិនទាន់បានអនុម័តសេចក្ដីព្រាងច្បាប់នេះជាផ្លូវការនៅឡើយទេ ប៉ុន្តែបទប្បញ្ញត្តិត្រូវបានគេរំពឹងថា នឹងចូលជាធរមាននៅថ្ងៃទី ១ ខែកក្កដា ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អឺរ៉ុប បញ្ជាក់ច្បាស់ៗជាថ្មីពីអត្ថប្រយោជន៍វ៉ាក់សាំង AstraZeneca

ចុចអាន ៖ អេស្ប៉ាញ ជាប្រទេសដំបូងបង្អស់នៅអឺរ៉ុប ចាប់ផ្ដើមចាក់វ៉ាក់សាំងតែមួយដូស Johnson & Johnson