ព្រឹកនេះ​ជា​ថ្ងៃ​ដំបូង ភោជនីយដ្ឋាន ហាង​អាហារ​ផ្សេងៗ​អនុញ្ញាត​ឲ្យ​ភ្ញៀវ​ចូល​អង្គុយ​ហូប​ចុក​ជា​ធម្មតា

អភិបាលរាជធានីភ្នំពេញលោក ឃួង ស្រេង បានចេញសេចក្ដីសម្រេចបិទបញ្ចប់បំរាមគោចរ និងការអនុញ្ញាតគោលការណ៍ពិសេស ចំពោះអាជីវកម្មដ្ឋានមួយចំនួនក្នុង «តំបន់លឿង» នៃភូមិសាស្ដ្ររាជធានីភ្នំពេញ គិតចាប់ពីម៉ោងសូន្យថ្ងៃទី២២ ខែឧសភា ឆ្នាំ២០២១នេះតទៅ អាច​ដំណើរការ​អាជីវកម្មជា​ធម្មតា​ឡើង​វិញ​បាន។

បើ​យោងតាម​សេចក្តី​សម្រេច​ដែល​ចេញ​កាលពី​ម្សិលមិញនេះ​ គិតចាប់ពីម៉ោងសូន្យ នាថ្ងៃទី២២ ខែឧសភា ឆ្នាំ២០២១តទៅរាល់ការធ្វើចរាចរណ៍ និងរាល់សកម្មភាពការងារ មុខរបរ ឬអាជីវកម្មគ្រប់ទីផ្សារ ភោជនីយដ្ឋាន អាហារដ្ឋាន តូបអាហារ ហាងកាហ្វេ ហាងភេសជ្ជៈ និងអាជីវកម្មដ្ឋានផ្នែកអាហារ-ភេសជ្ជៈគ្រប់ប្រភេទ អាចដំណើរការអាជីវកម្មជាប្រក្រតី និងអាចទទួលអតិថិជនឲ្យចូលមកទទួលទានក្នុងបរិវេណអាជីវកម្មដ្ឋានឡើងវិញ។

ជាមួយ​គ្នា​នេះ ការលក់គ្រឿងស្រវឹងគ្រប់ប្រភេទ ក៏​ត្រូវ​បានអនុញ្ញាតិឲ្យ​បើក​អាជីវកម្ម​ឡើង​វិញ​​ក្នុងមូលដ្ឋានរាជធានីភ្នំពេញ។

យ៉ាងណា​មិញ សកម្មភាពការងារ មុខរបរ និងអាជីវកម្ម ដែលបានអនុញ្ញាតឱ្យបើកដំណើរការត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ឺងម៉ាត់​មាន​ជាអាទិ៍ កាតព្វកិច្ចពាក់ម៉ាស កាតព្វកិច្ចរក្សាគម្លាតសុវត្ថិភាព ការធ្វើអនាម័យដើម្បីសម្លាប់មេរោគ ការវាស់កម្ដៅ ការស្កេន QR Code និងត្រូវអនុវត្តតាមការណែនាំរបស់ក្រសួងសុខាភិបាល៕