ចាំទេ ត្រាំ ហៅ កូវីដ ថា “វីរុសចិន” ឥឡូវត្រូវប្ដឹងដោយក្រុមសិទ្ធិពលរដ្ឋស៊ីវិលចិនអាមេរិក

អតីតប្រធានាធិបតីសហរដ្ឋអាមេរិក លោក ដូណាល់ ត្រាំ ត្រូវបានក្រុមសិទ្ធិស៊ីវិលចិន ប្តឹងពីបទហៅជំងឺកូវីដ ១៩ ថា “វីរុសចិន” ។

ពាក្យបណ្តឹងដែលត្រូវបានដាក់ នៅក្នុងតុលាការសហព័ន្ធ នៅទីក្រុងញូវយ៉ក ដោយសម្ព័ន្ធភាពសិទ្ធិពលរដ្ឋស៊ីវិលចិន អាមេរិក (CACRC) បានចោទប្រកាន់ថា ការប្រើប្រាស់ឃ្លានោះរបស់លោក ត្រាំ និងពាក្យប្រកាន់ពូជសាសន៍ ស្រដៀងគ្នាផ្សេងទៀត គឺគ្មានមូលដ្ឋាននោះទេ ព្រោះប្រភពដើមនៃវីរុសនេះ មិនទាន់ត្រូវបានកំណត់នៅឡើយទេ ហើយការប្រព្រឹត្ដរបស់អតីតប្រធានាធិបតីខាងលើ បានធ្វើឲ្យសហគមន៍អាមេរិក ចិន ឈឺចាប់ ។

បណ្តឹងចុះថ្ងៃទី ២០ ខែឧសភា បានបញ្ជាក់ថា “ការប្រព្រឹត្តខ្លាំងក្លា និងសាហាវបំផុតរបស់លោក ត្រាំ ត្រូវបានអនុវត្តក្នុងអំឡុងរោគរាតត្បាតទាំងស្រុង ដោយមិនគិតពីការប្រព្រឹត្ត ថាតើអាកប្បកិរិយាបែបនេះ អាចបណ្តាលឲ្យជនជាតិអាមេរិក ចិន មានទុក្ខកង្វល់ខាងផ្លូវចិត្ត ឬក៏យ៉ាងណានោះទេ” ។

បណ្តឹងនេះ បានចោទប្រកាន់បន្ថែមទៀតថា លោក ត្រាំ បានបន្តប្រើពាក្យ ប្រមាថមើលងាយទាំងនោះ ដើម្បីសំដៅទៅលើជំងឺកូវីដ ១៩ ទោះបីជាគាត់ដឹងថា វីរុសនេះមិនបានមកពីប្រទេសចិនក៏ដោយ ។

ទន្ទឹមនោះ CACRC ប្ដឹងឲ្យលោក ត្រាំ បង់ប្រាក់ ១ ដុល្លារអាមេរិក ដល់គ្រប់ប្រជាជនអាស៊ីអាមេរិក និងកោះប៉ាស៊ីហ្វិកទាំងអស់ ដែលរស់នៅក្នុងសហរដ្ឋអាមេរិក ជាការសុំទោស ដោយក្នុងនោះមានទឹកប្រាក់សរុប ២២.៩ លានដុល្លារ ។

ដើមបណ្តឹងបាននិយាយថា ពួកគេនឹងប្រើលុយនេះ ដើម្បីបង្កើតសារមន្ទីរមួយ ដែលនឹងបង្ហាញពីប្រវត្តិរបស់សហគមន៍អាមេរិកអាស៊ី និងកោះប៉ាស៊ីហ្វិក ក៏ដូចជាការចូលរួមចំណែករបស់ពួកគេដល់សហរដ្ឋអាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ ចិន​ថ្កោល​ទោស​អាមេរិក​រឿង​​បញ្ឆេះ​ដុំ​នៅ​ហ្គាហ្សា

ចុចអាន ៖ ចិន ពេញចិត្តចំពោះ អាមេរិក ដែលចែកចាយវ៉ាក់សាំងកូវីដទៅក្រៅប្រទេសជាលើកដំបូង