ទាំងអ្នកជំងឺនិងអ្នកមិនឈឺ សម្រុកកកកុញទៅយកឱសថបុរាណឥណ្ឌា ពីគ្រូថ្នាំម្នាក់ ដោយជឿថា អាចព្យាបាលកូវីដបាន (មានវីដេអូ)

ស្របពេលដែលប្រទេសឥណ្ឌាកំពុងប្រយុទ្ធប្រឆាំងនឹងជំងឺកូវីដ-១៩រលកទី២ដ៏សាហាវ មានគ្រូថ្នាំម្នាក់ក្នុងតំបន់ Nellore នៃរដ្ឋ Andhra Pradesh បានចែកចាយឱសថបុរាណនិងថ្នាំបន្តក់ភ្នែក ដោយការចែកចាយនេះបានទាក់ទាញហ្វូងមនុស្សយ៉ាងច្រើនកកកុញមកទទួលថ្នាំ មានទាំងអ្នកកើតជំងឺកូវីដនិងអ្នកមិនកើតជំងឺកូវីដ។

គ្រូថ្នាំបុរាណរូបនេះ ត្រូវបានគេស្គាល់ឈ្មោះថា Anandaiah។ យ៉ាងណាក្តី ចៅក្រមស្រុករួមជាមួយគ្រូថ្នាំបុរាណមួយចំនួនបាននិយាយថា “គ្មានផលប៉ះពាល់អ្វីទេ ជាមួយនឹងគ្រឿងផ្សំបែបរុក្ខជាតិ ប៉ុន្តែសមាសធាតុដែលត្រូវបានប្រើសម្រាប់ធ្វើថ្នាំបន្តក់ភ្នែក អាចបង្កគ្រោះថ្នាក់ដល់ភ្នែករយៈពេលវែង”។

អភិបាលរដ្ឋ Andhra Pradesh លោក Y S Jagan Mohan Reddy កាលពីថ្ងៃសុក្រ បានបញ្ជាឲ្យមានការធ្វើតេស្តវិទ្យាសាស្ត្រលើឱសថបុរាណ Ayurveda នេះ ដែលត្រូវបានចែកចាយ ដើម្បីព្យាបាលជំងឺកូវីដ-១៩។

ប៉ុន្តែអ្វីដែលធ្វើឲ្យគេព្រួយបារម្ភនោះគឺថា ហ្វូងមនុស្សបានសម្រុកទៅយកថ្នាំ ដោយអ្នកខ្លះមិនពាក់ម៉ាស់ ហើយមិនគោរពវិធានការគម្លាតសង្គម ព្រោះក្នុងនោះក៏មានអ្នកជំងឺកូវីដចូលរួមទៅយកថ្នាំដែរ។

នៅពេលសួរអំពីហ្វូងមនុស្សកកកុញតម្រង់ជួរនៅខាងក្រៅ ដោយមិនគោរពវិធានការទប់ស្កាត់ជំងឺកូវីដ-១៩ លោកអភិបាលបាននិយាយថា កងកម្លាំងសន្តិសុខត្រូវបានដាក់ពង្រាយហើយធ្វើការអស់ពីលទ្ធភាពដើម្បីធានាថា ប្រជាជនអនុវត្តវិធានការគម្លាតសង្គម។

ទោះបីជាយ៉ាងណាក៏ដោយ មន្ត្រីនាយកដ្ឋានសុខាភិបាល បានព្រមានថា ការប្រមូលផ្តុំគ្នាបែបនេះ នឹងក្លាយជាចំណុចផ្ទុះនៃគ្រោះមហន្តរាយជំងឺកូវីដ-១៩ ថ្មីទៀត៕ 

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Indian Express

ចុចអាន៖ ធ្ងន់ធ្ងរទៅៗ ឥណ្ឌា ផ្ទុះ “ជំងឺផ្សិតស” មួយទៀត សាហាវជាង “ជំងឺផ្សិតខ្មៅ”