ករណីផ្ទុះកូវីដ១៩ នៅរោងចក្រ យូលី ផ្តើមចេញពីកម្មការិនីម្នាក់មានប្តីជាអ្នកដឹកបន្លែឆ្លងកូវីដ

លោក បណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានឲ្យដឹងនៅរសៀលថ្ងៃទី២២ឧសភានេះថាក្រុមការងារបានបន្តរកឃើញកម្មករចំនួន២៦នាក់បន្ថែមទៀតបម្រើការងារនៅរោងចក្រ យូលីនៅ ក្រុងបាវិតឆ្លងកូវីដ ១៩។

លោក កែរ រដ្ឋា លើកឡើងថា “បើគិតត្រឹមរសៀលថ្ងៃនេះក្រុមការងារបានរកឃើញបឋមមានកម្មករប្រមាណ៧៩នាក់ហើយបានឆ្លងជំងឺកូវូដ‑១៩ក្នុងនោះរកឃើញ៥នាក់កាលពីយប់មិញ ៤៨នាក់នៅព្រឹកមិញនិង២៦នាក់ទៀតនៅរសៀលនេះហើយក្រុមការងារកំពុងបន្តធ្វើតេស្តទៅលើកម្មករជិត២០០នាក់ជាបន្តទៀត”។

ប្រធានមន្ទីរសុខាភិបាលខេត្តស្វាយរៀងរូបនេះបានឱ្យដឹងថា ករណីផ្ទុះជំងឺ‑១៩ នៅរោងចក្រយូលី ស្ថិតនៅក្នុងតំបន់សេដ្ឋកិច្ចពិសេសសាន់តុង ក្រុងបាវិត ខេត្តស្វាយរៀង នេះគឺផ្តើមចេញពីកម្មការិនីម្នាក់ ដែលបានឆ្លងពីប្តីរបស់ខ្លួនជាអ្នកដឹកបន្លែពីស្វាយរៀងយកទៅលក់ផ្សារដើមគររាជធានីនៅភ្នំពេញ។

ក្រោយមកបុរសជាប្តីកម្មករនោះគាត់មានបញ្ហាសុខភាពបានទៅពិនិត្យនៅមន្ទីរពេទ្យជម្ភូហើយបានទៅយកសំណាកនៅមណ្ឌលចត្តាឡឺស័ក មីស្ទ័រសូ។ លុះដល់រកឃើញមានវិជ្ជមានទើបក្រុមការងារបានយកប្រពន្ធគាត់ជាកម្មករធ្វើការនៅ​រោងចក្រយូលី ទៅធ្វើតេស្តក៏មានវិជ្ជមានដូចគ្នាហើយក្រុមការងារក៏បានបន្តស្រាវជ្រាវដល់រោងចក្រតែម្តងទៅ។

គិតត្រឹមថ្ងៃទី២១ ខែឧសភា ឆ្នាំ២០២១ នេះខេត្តស្វាយរៀងមានអ្នកឆ្លងជំងឺកូវីដ‑១៩ ចំនួន៤១៤នាក់ ជាសះស្បើយចំនួន៣៤១នាក់ស្លាប់ចំនួន៥នាក់និងកំពុងព្យាបាលចំនួន៦៧នាក់នៅតាមកន្លែងព្យាបាលជំងឺកូវីដ‑១៩ ចំនួន៣កន្លែង​ទី១.នៅមន្ទីរពេទ្យបង្អែកស្វាយជ្រំ ទី២.មន្ទីរពេទ្យបង្អែកសាមគ្គីរំដួលនិងទី៣.មណ្ឌលព្យាបាលជំងឺកូវីដ ១៩ក្រុបាវិត៕

សំអឿន