ប្រសើរណាស់! ក្រុមប្រទេស G20 ប្តេជ្ញាធានាចែកចាយវ៉ាក់សាំងដោយស្មើភាពគ្នាមិនឲ្យលើសខ្វះ

មេដឹកនាំពិភពលោកនៃក្រុមប្រទេស G20 បានព្រមព្រៀងគ្នានៅឯកិច្ចប្រជុំកំពូលស្តីពីសុខភាពពិភពលោក ដើម្បីធ្វើកិច្ចសហប្រតិបត្តិការ ធានាការចែកចាយវ៉ាក់សាំងការពារជំងឺកូវីដ ១៩ ដោយស្មើភាពគ្នា ។

កិច្ចប្រជុំកំពូលតាមអ៊ីនធឺណិតកាលពីថ្ងៃសុក្រ ត្រូវបានរៀបចំរួមគ្នាដោយប្រទេសអ៊ីតាលី ដែលបច្ចុប្បន្នជាប្រធាននៃក្រុមប្រទេស G20 និងសហគមន៍អ៊ឺរ៉ុប ។ កិច្ចប្រជុំនោះក៏មានការចូលរួមពី នាយករដ្ឋមន្រ្តីជប៉ុនលោក Suga Yoshihide និងថ្នាក់ដឹកនាំនៃប្រទេស និងតំបន់ជាង ២០ ព្រមទាំងប្រធានអង្គការអន្តរជាតិ ផងដែរ ។

ទន្ទឹមនោះ ប្រធានសហភាពអ៊ឺរ៉ុបលោកស្រី Ursula von der Leyen បាននិយាយថា “យើងត្រូវតែធ្វើសកម្មភាពឥឡូវនេះ ដើម្បីគ្រប់គ្រងជំងឺរាតត្បាតនៅក្រោមការគ្រប់គ្រងទូទាំងពិភពលោក” ។ លោកស្រីបានសន្យាថា សហភាពអឺរ៉ុប នឹងបរិច្ចាគវ៉ាក់សាំងចំនួន ១០០ លានដូសដល់ប្រទេសកំពុងអភិវឌ្ឍន៍ ខណៈលោកស្រីក៏បានប្តេជ្ញាជួយវ៉ាក់សាំងដល់ទ្វីបអាហ្វ្រិកផងដែរ ។

ស្របពេលជាមួយគ្នានេះ ក្រុមហ៊ុនវ៉ាក់សាំង Pfizer និងក្រុមហ៊ុនឱសថមួយចំនួនទៀតបានសន្យាថា នឹងផ្តល់វ៉ាក់សាំងសរុបចំនួន ១.៣ ពាន់លានដូស សម្រាប់ប្រទេសកំពុងអភិវឌ្ឍន៍នៅឆ្នាំនេះ ។

បន្ថែមពីនេះ ប្រធានាធិបតីចិនលោក Xi Jinping ក៏បានសន្យាផ្តល់ជំនួយចំនួន ៣ ពាន់លានដុល្លារដល់ប្រទេសកំពុងអភិវឌ្ឍន៍ក្នុងរយៈពេល ៣ ឆ្នាំខាងមុខ ដើម្បីជួយពិភពលោកក្នុងការទប់ស្កាត់រោគរាតត្បាតជាសកលនេះ ខណៈរដ្ឋាភិបាលផ្សេងទៀតក៏បានធ្វើការសន្យាជួយដល់ប្រទេសកំពុងអភិវឌ្ឍន៍ផងដែរ ។

រហូតមកដល់បច្ចុប្បន្ននេះ វ៉ាក់សាំងការពារជំងឺកូវីដ ១៩ ប្រមាណ ១.៥ ពាន់លានដូស ត្រូវបានចាក់នៅទូទាំងពិភពលោក ។ ទោះយ៉ាងណា វ៉ាក់សាំង ៨៥ ភាគរយត្រូវបានចាក់នៅក្នុងប្រទេសអភិវឌ្ឍន៍ ខណៈវិធីដើម្បីបិទគម្លាតការចាក់វ៉ាក់សាំងនេះ បានក្លាយជាបញ្ហាប្រឈមដ៏ធំមួយ ចំពោះកិច្ចខិតខំប្រឹងប្រែងជាសកលប្រឆាំងនឹងរោគរាតត្បាត ៕

ប្រែស្រួលដោយ ៖ ជីវ័ន្ត

ប្រភព ៖ NHK