កូវីដ-១៩

ម្សិលមិញនេះ កូវីដបានសម្លាប់ប្តីប្រពន្ធក្នុងថ្ងៃតែមួយ បន្សល់កូនៗរស់នៅកំព្រាឪពុកម្តាយ

បានផុស

៤ years មុន

នៅ

ថ្ងៃអាទិត្យ ២៣ ឧសភា ២០២១

ដោយ

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល ប្រធានគណ:កម្មការចំពោះកិច្ចចាក់វ៉ាក់សាំងកូវីដ-១៩ និងជាអ្នកនាំពាក្យក្រសួងសុខាភិបាលលើកឡើងពីករណីស្លាប់ប្តីប្រពន្ធក្នុងថ្ងៃតែមួយ ដោយសារមេរោគកូវីដ ១៩។

លោកស្រីវេជ្ជបណ្ឌិតបានបញ្ជាក់ពីការបាត់បង់ជីវិតនៃស្វាមីនិងភរិយា បណ្តាលមកពីជំងឺកូវីដ-១៩ ក្នុងថ្ងៃតែមួយនៅថ្ងៃទី២២ ខែឧសភា ឆ្នាំ២០២១។ យ៉ាងណាអត្តសញ្ញាណអ្នកស្លាប់ជាប្តីប្រពន្ធ លោកជំទាវមិនបានបញ្ជាក់ឲ្យដឹងនោះទេ។

លោកជំទាវបានបញ្ជាក់ថា មេរោគដែលសម្លាប់មនុស្សមិនរើសមុខ រួមទាំងបានឆក់យកជីវិតស្វាមីភរិយាក្នុងពេលតែមួយនេះ គឺជាការពញ្ញាក់ស្មារតី និងក្រើនរំលឹកទាំងអស់គ្នាច្បាស់ណាស់ថា កូនៗក្តី ក្រុមគ្រួសារក្នុងផ្ទះជាមួយក្តី និងស្វាមី-ភរិយាក្តី ចាំបាច់ណាស់ដែលត្រូវតែការពារខ្លួនរាល់ពេលចេញក្រៅផ្ទះ ហើយត្រូវចងចាំថា ពេលត្រឡប់មកផ្ទះវិញ សូមកុំនាំវីរុសចង្រៃនេះចូលផ្ទះឱ្យសោះ ដើម្បីចៀសវាងឱ្យបាននូវការចម្លងបន្តគ្នា ដោយអនុវត្តវិធានការ “៣ការពារ និង៣កុំ” ដែលអាចជួយឱ្យរួចផុតពីទុក្ខភ័យ និងការបាត់បង់សមាជិកគ្រួសារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ឱ វណ្ណឌីន បន្ថែមថា ប្រសិនបើប្រញាប់ប្រញាល់ធ្វើសកម្មភាពប្រចាំថ្ងៃរបស់បុគ្គលម្នាក់ៗ និងជាពិសេសការបើកប្រកបរបររកស៊ីទទួលទានឡើងវិញតាមបែបធម្មតា ដូចកាលពីមុនមិនទាន់មានបញ្ហារាតត្បាតជំងឺកូវីដ-១៩ ដោយមិនបានត្រៀមលក្ខណ:ឱ្យស្របតាមបរិបទ “ធម្មតា តាមបែបគន្លងថ្មី” ដើម្បីការពារការចម្លងជំងឺកូវីដ-១៩នេះ ឱ្យបានត្រឹមត្រូវទុកជាមុនទេនោះ មិនយូរមិនឆាប់ នឹងនាំការវិលត្រឡប់នៃការឆ្លងរាតត្បាត និងការបិទខ្ទប់នៅថ្ងៃណាមួយឡើងវិញជាមិនខានឡើយ។ សូមមេត្តាចងចាំត្រង់ចំណុចនេះ។

លោកស្រីបន្តថា បន្ទាប់ពីជួបប្រទះការបិទខ្ទប់រួចមក យើងចង់ត្រឡប់ទៅជីវិតធម្មតាវិញ។ ប៉ុន្តែវីរុសកូវីដ-១៩ កំពុងតែចរាចរយ៉ាងទូលំទូលាយនៅក្នុងប្រទេស។ ដូច្នេះត្រូវតែអនុវត្តជីវិតធម្មតាឱ្យទៅជាធម្មតាបែបគន្លងថ្មីមួយ ក្នុងការការពារការចម្លងវីរុសកូវីដ-១៩ សម្រាប់បុគ្គល សម្រាប់ក្រុមគ្រួសារ និងសម្រាប់សហគមន៍ ប្រសិនបើមិនចង់ឱ្យមានការបើក និងបិទខ្ទប់ ចុះឡើងៗវិញនោះទេ។

Related Topics:កូវីដ-១៩