ខេត្តកំពង់ស្ពឺរកឃើញវិជ្ជមាន​កូវីដ១៩ថ្មីចំនួន ១០៦ នាក់

មន្ត្រីនៃមន្ទីរសុខាភិបាលខេត្តកំពង់ស្ពឺ នៅថ្ងៃទី២៩ ខែឧសភា ឆ្នាំ២០២១នេះ បានរក​ឃើញ​អ្នកវិជ្ជ​មាន​កូវីដ-១៩ ចំនួន១០៦នាក់ សន្ទុះនៃការកើនឡើងនេះធ្វើឱ្យមានក្តីបារម្ភយ៉ាង​ខ្លាំងសម្រាប់​ខេត្ត​មួយ​នេះ។

យោងតាមរបាយការណ៍ផ្លូវការណ៍ បានឱ្យដឹងថា សរុបចំនួនអ្នកឆ្លងនៅកំពង់ស្ពឺបានកើនដល់ ៧៦០នាក់ អ្នកជាសះស្បើយ​សរុបចំនួន ១៧៨នាក់ កំពុងសម្រាកព្យាបាលចំនួន ៥៦៤នាក់ និងអ្នកស្លាប់កើនដល់ចំនួន ១៣នាក់។

ក្នុងរយៈពេលមួយសប្តាហ៍ចុងក្រោយនេះក្នុងខេត្តកំពង់ស្ពឺ មានការកើនឡើងជំងឺកូវីដ-១៩ គួរឱ្យបារម្ភខ្លាំង ទើបនៅរសៀលថ្ងៃទី២៩ ខែឧសភា ឆ្នាំ ២០២១នេះ លោក វ៉ី សំណាង អភិបាលខេត្តកំពង់ស្ពឺ បានដឹកនាំមន្ត្រីពាក់ព័ន្ធ និងអាជ្ញាធរបានរៀបចំមណ្ឌលចត្តាឡីស័ក និងព្យាបាលជំងឺកូវីដ-១៩ (គោលដៅទី១៩) នៃអាគារស្នាក់កម្មកររោងចក្រ GENERATION ស្ថិតក្នុងភូមិធ្លក ឃុំត្រពាំងគង ស្រុកសំរោងទង ខេត្តកំពង់ស្ពឺ អាចដាក់អ្នកជំងឺបានប្រមាណចំនួន ២,០០០នាក់៕

អត្ថបទ៖ ភួង រដ្ឋា