សំឡេងទ្រហោយំគួរឱ្យសង្វេគ ខណៈរថយន្តពេទ្យមកដឹកសពលោកតាទាំងកណ្តាលអធ្រាត្រ

ភ្នំពេញ៖ សំឡេងទ្រហោយំគួរឱ្យសង្វេគទាំងកណ្តាលអធ្រាត្រ ធ្វើឱ្យអ្នកភូមិមានការភ័យខ្លាច និងអាណិតអាសូរខណៈដែលរថយន្តរបស់មន្ទីរសុខាភិបាលរាជធានីភ្នំពេញមកដឹកសពលោកតាម្នាក់ដែលមានវីជ្ជមានកូវីដ-១៩។

យោងតាមសេចក្តីរាយការណ៍ពីលោក សេង វ៉ាន់ថា ចៅរងទី១ សង្កាត់ស្ទឹងមានជ័យទី២ បាន​ឱ្យ “កម្ពុជាថ្មី” ដឹងថាកាលពីវេលាម៉ោង២៣យប់ ថ្ងៃទី១៣ ខែមិថុនានេះ រថយន្តមន្ទីរសុខាភិបាលរាជធានីភ្នំពេញបានមកដឹកសពលោកតា ចាន់ នៅ អាយុ៨៥ឆ្នាំ រស់នៅភូមិដំណាក់ធំ១ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ បន្ទាប់ពីក្រុមគ្រូពេទ្យបានពិនិត្យសំណាកសពលោកតាឃើញវិជ្ជមានកូវីដ-១៩។

លោកចៅរងបន្តថា ចំពោះក្រុមគ្រួសារសពលោកតាមានរហូតដល់១០នាក់ដែលគ្រូពេទ្យឱ្យធ្វើចត្តាឡីស័ករង់ចាំការពិនិត្យសំណាកដើម្បីស្រាវជ្រាវរកអ្នកមានវិជ្ជមានកូវីដ-១៩។
អ្វីដែលសង្វេកនោះគឺក្រុមគ្រួសារសពនាំគ្នាស្រែកទ្រហោយំ ព្រោះសពលោកតាមមិនអនុញ្ញាតកូនចៅប៉ះពាល់សព និងជួបជុំរៀបចំធ្វើបុណ្យបន្តទៀតឡើយ៕

អត្ថបទ៖ នរា