រកឃើញអ្នកឆ្លងថ្មី៦២នាក់នៅខេត្តកោះកុង ក្រោយផ្ទុះកូវីដ-១៩នៅស្រុកមណ្ឌលសីមា

ខេត្តកោះកុង៖ អត្រាឆ្លងកូវីដ-១៩ នៅតំបន់ជាប់ព្រំដែនកម្ពុជា-ថៃកាន់តែបន្តកើនឡើងខ្ពស់ អាជ្ញាធរជំនាញខេត្តកោះកុងបានចុះពិនិត្យ និងរកឃើញអ្នកឆ្លងថ្មីកូវីដ-១៩ ចំនួន៦២នាក់ ក្នុងភូមិចាំយាម ស្រុកមណ្ឌលសីមា។

អាជ្ញាធរខេត្ត ក្រុមមន្រ្តីសុខាភិបាលខេត្តកោះកុងអះអាងថា ចំនួនអ្នកឆ្លងថ្មី៦២នាក់ នេះ កើតឡើងបន្ទាប់ពីបានរកឃើញអ្នកឆ្លងជំងឺកូវីដ-១៩ ជាង១៦១នាក់ កាលពីថ្ងៃទី១៤ ខែមិថុនា ឆ្នាំ២០២១ថ្មីៗនេះ។ ការឆ្លងនេះផ្តើមចេញពីបុរស២នាក់បម្រើការងារជាបុគ្គលិកនៅកំពង់ផែស្ងួតនាងកុក ឃុំប៉ាក់ខ្លង ស្រុកមណ្ឌលសីមា ក្រោយធ្វើតេស្តរហ័សកាលពីថ្ងៃទី១៣ ខែមិថុនា ២០២១កន្លងទៅ។

ការរកឃើញចំនួនអ្នកឆ្លងថ្មី យ៉ាងរហ័សក្នុងភូមិសាស្រ្តស្រុកមណ្ឌលសីមា ជាបន្តបន្ទាប់នាពេលនេះ ត្រូវបានលោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង បញ្ជាក់ថា ផ្តើមចេញពី បុរសឈ្មោះ ង៉ែត តន ជាបុគ្គលិកបម្រើការងារនៅកំពង់ផែស្ងួតនាងកុក ជាប់ពាក់ព័ន្ធនឹងតៃកុងរថយន្តដឹកជញ្ជូនអីវ៉ាន់មកពីប្រទេសថៃ និងអ្នករថយន្តតាក់ស៊ីមកពីរាជធានីភ្នំពេញ និងបុរសឈ្មោះ ម៉ិល ម៉ុត ទៅអាហារដ្ឋាន ចែ ឆយ ហួសវិទ្យាល័យចាំយាម។

លោកវេជ្ជបណ្ឌិតបន្ថែមទៀតដែរថា រាល់ទីតាំងដែលបុរសទាំងពីរ២នាក់ធ្វើដំណើរនោះជាប់ពាក់ព័ន្ធប្រមាណជា១០ទីតាំង ហើយត្រូវបានឱ្យផ្អាកអាជីវកម្ម និងធ្វើចត្តាឡីស័ករយៈពេល១៤ថ្ងៃ តាមដានអាការៈយ៉ាងលម្អិត ដោយមិនអនុញ្ញាតឱ្យចាកចេញទៅណាមកណាឡើយ។

លោកវេជ្ជបណ្ឌិត ទៅ ម៉ឹង បានឱ្យដឹងបន្តថា អ្នកជំងឺដែលរកឃើញវិជ្ជមានកូវីដ-១៩ បញ្ជូនមកព្យាបាលនៅវិទ្យាល័យចាំយាម។

គួរជម្រាបថា អ្នកជំងឺកូវីដ-១៩ទាំងនៅស្រុកមណ្ឌលសីមា និងស្រុកស្រែអំបិលក្នុងខេត្តកោះកុងមានជាង២០០នាក់ ដោយចំនួនអ្នកជាសះស្បើយបានប្រមាណ៥០នាក់ប៉ុណ្ណោះ។

ដើម្បីជាសញ្ញាបង្កើនការប្រុងប្រយ័ត្នខ្ពស់ និងទប់ស្កាត់ការរីកដាលរាលប្រកបដោយប្រសិទ្ធិភាព អាជ្ញាធរមន្រ្តីជំនាញបានក្រើនរំលឹកជាថ្មីដល់ប្រជាពលរដ្ឋ និងអ្នកពាក់ព័ន្ធទាំងអស់បន្តចូលរួមអនុវត្តវិធានការសុភិបាលឱ្យបានខ្ជាប់ខ្ជួនបំផុត ករណីមានរោគសញ្ញាសង្ស័យណាប្រញាប់មកពិគ្រោះយោបល់ជាមួយក្រុមគ្រូពេទ្យ៕

អត្ថបទ៖ សិរីវឌ្ឍនៈ