​បាត់ដំបង​ថ្ងៃនេះ បន្ត​រក​ឃើញ​អ្នក​វិជ្ជមាន​កូ​វីដ​-១៩ ចំនួន ២៣ នាក់ និង​មាន​អ្នកជា​សះស្បើយ​ចំនួន ២១ នាក់

បាត់ដំបង ៖ អាជ្ញាធរ​ខេត្ត​បាត់ដំបង នៅ​ថ្ងៃទី ១៨ ខែមិថុនា ឆ្នាំ​២០២១​នេះ បន្ត​រក​ឃើញ និង​បង្ហាញ​អត្តសញ្ញាណ​អ្នក​វិជ្ជមាន​កូ​វីដ​១៩ ចំនួន ២៣ នាក់ ក្នុង​នោះ​ជា​ពលករ​ទើប​វិលត្រឡប់​មកពី​ប្រទេស​ថៃ ចំនួន ២ នាក់ ពាក់ព័ន្ធ​នឹង​ព្រឹ​ត្តិ​ការណ៍​២០​កុម្ភៈ​ចំនួន ២១ នាក់ និង​មាន​ករណី​ជាសះស្បើយ​ចំនួន ២១ នាក់​។ នេះ​បើតាម​សេចក្តីប្រកាស​ព័ត៌មាន​ដែល​បណ្តាញ​ព័ត៌មាន កម្ពុ​ជាថ្មី ទទួលបាន​នៅ​យប់​ថ្ងៃទី​១៨ ខែមិថុនា នេះ​។​

​សូម​បញ្ជាក់​ថា គិត​ត្រឹម​ថ្ងៃទី​១៨ ខែមិថុនា ឆ្នាំ២០២១​នេះ ខេត្តបាត់ដំបង មាន​អ្នក​ឆ្លង​ជំងឺ​កូ​វីដ​១៩ សរុប​ចំនួន ៦១៤ នាក់ និង​បានជា​សះស្បើយ​ចំនួន ៣១៩ នាក់ ស្លាប់​ចំនួន ៣ នាក់ និង​កំពុង​សម្រាក​ព្យាបាល​ក្នុង​មន្ទីរពេទ្យ​ចំនួន ២៩២ នាក់​៕

ដោយ ៖ សោ និយម​រ័ត្ន​