រដ្ឋបាលខេត្ត បិទផ្សារសាមគ្គីស្ទឹងត្រែង ខណៈរកឃើញអាជីវករវិជ្ជមាន កូវីដ-១៩ ច្រើននាក់

ខេត្តស្ទឹងត្រែង៖ រដ្ឋបាលខេត្តស្ទឹងត្រែងបានសម្រេចបិទផ្សារ សាមគ្គីស្ទឹងត្រែងជា បណ្ដោះ​អាសន្ន ខណៈរកឃើញអាជីវករលក់ដូរក្នុងផ្សារវិជ្ជមាន កូវីដ-១៩ ជាច្រើននាក់ កាលពីថ្ងៃទី ២៦ខែមិថុនាឆ្នាំ២០២១នេះ។

លោកវេជ្ជបណ្ឌិត ទន វុទ្ធី អនុប្រធានមន្ទីរសុខាភិបាលខេត្ត និងជាប្រធានស្រាវជ្រាវប្រយុទ្ធនឹងជំងឺ​ឆ្លងកូវីដ-១៩ ខេត្តបានបញ្ជាក់ថា បន្ទាប់ពីមានការផ្ទុះជំងឺកូវីដ-១៩ នៅតាមភោជនីយដ្ឋាននានា ក៏ដូចជាក្នុងផ្សារសាមគ្គីស្ទឹងត្រែង និងបានរកឃើញអាជីវករលក់ដូរវិជ្ជមានកូវីដ-១៩ជាច្រើននាក់នោះ រដ្ឋបាលខេត្តស្ទឹងត្រែង បានសម្រេចបិទផ្សារជាបណ្ដោះអាសន្នរហូត​ដល់​មាន​ការជូន​ដំណឹងជាថ្មី។

លោកវេជ្ជបណ្ឌិតបានបន្តឲ្យដឹងទៀតថា អាជីវករជាអ្នកវិជ្ជមានកូវីដ-១៩ ភាគច្រើនជា អ្នកលក់ដូរ ក្នុងផ្សារសាមគ្គីស្ទឹងត្រែង ខ្លះទៀតជាអ្នកលក់នាឡិកា និងខ្លះទៀតជាអ្នកលក់អីវ៉ាន់គ្រប់​ប្រភេទ​ក្នុងផ្សារ ក្នុងនោះក៏មានសន្តិសុខផ្សារម្នាក់ផងដែរ។

ពាក់ព័ន្ធក្នុងករណីខាងលើនេះ រដ្ឋបាលខេត្តស្ទឹងត្រែងសូមអំពាវនាវដល់ប្រជាពលរដ្ឋ អាជីវករ​លក់ដូរក្នុងផ្សារ ដែលពាក់ព័ន្ធនិងបុគ្គលវិជ្ជមានកូវីដ-១៩ ផ្ទាល់ ឬប្រយោល និងធ្លាប់ចេញ​ចូលទីតាំងដែលមានវិជ្ជមានកូវីដ-១៩ ត្រូវនាំគ្នាធ្វើចត្តាឡីស័កតាមផ្ទះក្នុងគ្រួសាររៀងៗខ្លួន ដោយ​មិន​មានការពាក់ព័ន្ធជាមួយអ្នកដទៃឡើយ។

សូមបញ្ជាក់ថារហូតមកត្រឹមល្ងាចថ្ងៃទី២៦ មិថុនា ឆ្នាំ២០២១នេះ ខេត្តបានរកឃើញអ្នកឆ្លង​កូវីដ-១៩ ចំនួន១៥៨នាក់ ស្រី៨០នាក់ ជាសះស្បើយ ១៣នាក់ ស្រី៦នាក់ កំពុងសម្រាក​ព្យាបាល ១៤៥ នាក់ស្រី ៧៤នាក់៕

អត្ថបទ៖ ងិន លីម