ណុប បាយ៉ារិទ្ធ ស្នើមហាជនកុំរើសអើងអ្នកជំងឺកូវីដ-១៩ ដែលជាសះស្បើយ

ភ្នំពេញ៖ តារាចម្រៀងលោក ណុប បាយ៉ារិទ្ធ ដែលបានជាសះស្បើយជំងឺកូវីដ-១៩​ រយៈពេល​យូរខែមកហើយ លោកបានស្នើអ្នកគាំទ្រ និងមហាជន សូមកុំរើស​អើងអ្នកជំងឺកូវីដ-១៩ ដែលជាសះស្បើយ។

លោក ណុប បាយ៉ារិទ្ធ បានលើកឡើងថា សូមកុំរើសអើងអ្នកជំងឺកូវីដ-១៩ ដែលជាសះស្បើយ​ហើយ ព្រោះជំងឺនេះបង្កឡើងដោយមេរោគ ពេលសម្លាប់មេរោគអស់ពីក្នុងខ្លួនអ្នក​ជំងឺ នឹងជាសះ​ស្បើយ​ សុខភាពនឹងឈានទៅរកភាពល្អប្រសើរធម្មតាវិញ។ ដូច្នេះប្រសិនបើខ្លាច​អ្នកជំងឺ​ដែលឈឺ​ហើយជាសះស្បើយ ក៏គួរតែខ្លាច និងប្រុងប្រយ័ត្នឱ្យកាន់តែខ្លាំងជាងមុន។

លោកបន្តថា សម្រាប់មនុស្សផ្សេងៗទៀតយើងមិនអាចមើលដឹងថាគេឈឺមិនឈឺផង រឹតតែមើលនឹងភ្នែកមិនដឹងថានរណាមានផ្ទុកមេរោគនេះ ឬអត់ទេ សុទ្ធតែស្ថិតក្នុងការសង្ស័យគ្រប់ៗ​គ្នា​ ដូច្នេះ​បង្កើនការប្រុងប្រយ័ត្នរៀងៗខ្លួន ៣កុំ៣ការពារ។

តារាចម្រៀង ណុប បាយ៉ារិទ្ធ បន្ថែមថា កុំរើសអើងអ្នកជំងឺដែលជា រួចហើយភ្លេចការការពារខ្លួនឯង​នោះ​ អ្នកនៅតែប្រឈមមុខក្នុងការក្លាយខ្លួនជាអ្នកជំងឺកូវីដ-១៩ដូចគេមិនខាន។ រួមគ្នាប្រយុទ្ធប្រឆាំងនឹងជំងឺកូវីដ-១៩ ដោយការទៅចាក់វ៉ាក់សាំងការពារឱ្យបាន២ដងគ្រប់ៗគ្នា៕

អត្ថបទ៖ ចាន់រ៉ា