ពលករខ្មែរជិត ២០០នាក់ ត្រូវបានថៅកែថៃដឹកមកទំលាក់តាមផ្លូវក្បែរព្រំដែនខេត្តសុរិន្ទ

ប្រទេសថៃ៖ នៅក្នុងខេត្តសុរិន្ទ កម្លាំងប៉ូលិសអន្តោប្រវេសន៍ថៃបានដើរប្រមូល​ពលករ​ខ្មែរដែលថៅកែ ឬអ្នកម៉ៅការសំណង់បានដឹកយកមកទំលាក់នៅតាមផ្លូវ ដើម្បីបញ្ជូន​មក​កា​ន់ប្រទេសកម្ពុជាវិញ កាលពីម្សិលមិញនេះ ដោយសារតែខេត្តំនួន៤ នៅភាគខាងត្បូងនៃប្រទេសថៃ មានការផ្ទុះកូវីដ​-១៩ ធ្ងន់ធ្ងរពេក ដែលតម្រូវឱ្យមានការផ្អាកការងារមួយចំនួនធំ។

យោងតាមកិច្ចប្រជុំរបស់គណរដ្ឋមន្ត្រីកាលពីប៉ុន្មានថ្ងៃមុននេះ លោកនាយករដ្ឋមន្ត្រីថៃ ប្រាយុទ្ធ ច័ន្ទអូឆា បានសម្រេច​បិទ​ខ្ទប់ខេត្តចំនួន៤ នៅភាគខាងត្បូងនៃប្រទេសថៃ ( ជាប់ព្រំដែនភូមា ) គឺមានខេត្តសុងខ្លា ខេត្តនរ៉ាធីវ៉ាត ខេត្តយ៉ាឡា និងខេត្តប៉ាតានី បន្ទាប់មានការផ្ទុះនូវជំងឺកូវីដ-១៩ ខ្លាំងពេក និងកំណត់ឱ្យមានការបិទនូវទីតាំងការងារមួយចំនួនធំ ពិសេស​គឺការងារកសាង ដែលការបិទខ្ទប់នេះត្រូវចាប់ផ្តើមពីថ្ងៃទី២៨ ខែមិថុនា ឆ្នាំ២០២១ នេះតទៅ។

ដោយសារបញ្ហានេះហើយទើបបានជាទីតាំងកសាងស្ទើរទាំងអស់ ចាប់ផ្តើមឱ្យកម្មករវិល​ត្រឡប់​ទៅកាន់លំនៅឋានវិញជាបណ្តោះអាសន្ន។ ដោយឡែកកាលពីថ្ងៃទី២៧ ខែមិថុនា ម្សិលមិញនេះ នៅក្នុងខេត្តសុរិន្ទ ត្រង់ម្តុំស្រុកកាប់ឈើង គឺមានការដឹកពលករខ្មែរយក​មកទំលាក់​តាមផ្លូវសរុបប្រមាណ ២០០នាក់ ដើម្បីឱ្យធ្វើដំណើរមកកម្ពុជាវិញតាមច្រកអន្តរជាតិ ចម ក្នុងឃុំដាន ស្រុកកាប់ឈើង ខេត្តសុរិន្ទ។

នៅពេលនោះដែរគេសង្គេតឃើញកម្លាំងប៉ូលិសអន្តោប្រវេសន៍ស្រុកកាប់ឈើង បានប្រមូលកម្មករ​ខ្មែរ​ទាំងអស់យកទៅពិនិត្យសំណាក និងវាស់កម្តៅទើបអាចឱ្យវិលត្រឡប់មក​កាន់ស្រុក​កំណើត​វិញ។ ប៉ុន្តែរហូតមកទល់នឹងពេលនេះគេមិនដឹងថា តើពលករខ្មែរទាំងនោះបានឆ្លងដែនមក​ដល់​ទឹកដី​ខ្លួនហើយ ឬនៅ ហើយក៏មិនដឹងថា​តើកម្លាំងសមត្ថកិច្ចយើងបានត្រៀមឱ្យ​ពួកគេ​ធ្វើចត្តាឡីស័ក ឬយ៉ាងណានោះដែរ៕

អត្ថបទ៖ សោ និយមរ័ត្ន