កូវីដនៅឥណ្ឌា អ្នកស្លាប់កើនលើស ៤០ម៉ឺននាក់ហើយ

ចំនួននៃការស្លាប់ដោយសារជំងឺកូវីដ-១៩ នៅក្នុងប្រទេសឥណ្ឌា បានកើនលើស ៤០០,០០០នាក់ហើយ។

ទោះបីជាយ៉ាងណាក៏ដោយ ក្រុមអ្នកជំនាញបានព្រមានថា ចំនួនអ្នកស្លាប់ពិតប្រាកដ អាចនឹងខ្ពស់ជាងនេះឆ្ងាយណាស់ ខណៈអ្នកស្លាប់ជាច្រើន មិនត្រូវបានកត់ត្រាជាផ្លូវការ។

ឥណ្ឌា គឺជាប្រទេសទី៣នៅលើពិភពលោក បន្ទាប់ពីសហរដ្ឋអាមេរិកនិងប្រេស៊ីល ដែលមានអ្នកស្លាប់ច្រើនជាង ៤០ម៉ឺននាក់។

ប្រទេសនេះ ក៏បានកត់ត្រានូវករណីឆ្លងចំនួន ៣០ លានករណីផងដែរ ដោយឈរនៅលំដាប់ទី ២ បន្ទាប់ពីសហរដ្ឋអាមេរិក។

ចំនួនករណីឆ្លងប្រចាំថ្ងៃជាមធ្យមនៅក្នុងប្រទេសឥណ្ឌា បានធ្លាក់ចុះមកនៅត្រឹមជាង ៤ ម៉ឺននាក់ ក្នុងរយៈពេលប៉ុន្មានថ្ងៃថ្មីៗនេះ ពោលគឺធ្លាក់ចុះពីចំនួនកំពូល ៤០ ម៉ឺននាក់ក្នុងខែឧសភា។ ការធ្លាក់ចុះនេះ ភាគច្រើនគឺបណ្តាលមកពីវិធានការបិទខ្ទប់ ដ៏តឹងរ៉ឹងដែលដាក់ដោយរដ្ឋនានា ប៉ុន្តែអ្នកជំនាញបានព្រមានអំពីរលកទី ៣ ដែលខិតជិតមកដល់ហើយ។

តិចជាង ៥ភាគរយនៃប្រជាជនរបស់ប្រទេសនេះ បានទទួលវ៉ាក់សាំងពេញលេញ ចាប់តាំងពីយុទ្ធនាការចាក់ថ្នាំបង្ការ ចាប់ផ្តើមនៅខែមករា។

រដ្ឋាភិបាលសហព័ន្ធ មានគោលបំណងចាក់វ៉ាក់សាំងដល់ប្រជាជនឥណ្ឌាទាំងអស់ នៅត្រឹមចុងឆ្នាំនេះ ប៉ុន្តែយុទ្ធនាការនេះ ត្រូវបានរារាំងដោយល្បឿនយឺត កង្វះវ៉ាក់សាំងនិងការស្ទាក់ស្ទើរចាក់ថ្នាំ៕

ប្រែសម្រួល៖ Vann Vann

ប្រភព៖ BBC

ចុចអាន៖ កាន់តែធ្ងន់ធ្ងរ! ថៃ មានអ្នកស្លាប់ដោយសារកូវីដ ច្រើនបំផុត បំបែកកំណត់ត្រា ៣ថ្ងៃជាប់គ្នា