បិទខ្ទប់ផ្សារបឹងឈូក ១៤ ថ្ងៃ ក្រោយ​រកឃើញអាជីវករ ៨ នាក់ វិជ្ជមានកូវីដ

នៅល្ងាចថ្ងៃទី២ ខែកក្កដា ឆ្នាំ២០២១ នេះ រដ្ឋបាលខេត្តបាត់ដំបង សម្រេចធ្វើការបិទខ្ទប់ផ្សារបឹងឈូកជាបណ្តោះអាសន្ន ក្នុងរយៈពេល ១៤ ថ្ងៃ រហូតដល់មានការសម្រេចជាថ្មី បន្ទាប់ពីក្រុមគ្រូពេទ្យបានរកឃើញមានអាជីវករចំនួន ៨ នាក់ ដែលមានផ្ទុកជំងឺកូវីដ-១៩។

លោក ផេង សិទ្ធី អភិបាលក្រុងបាត់ដំបង បានបញ្ជាក់ប្រាប់កម្ពុជាថ្មី នាព្រឹកថ្ងៃទី ៣ ខែកក្កដា នេះថា បច្ចុប្បន្ន
អាជីវករទាំង ៨ នាក់ ត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្ត រួចហើយ ដោយឡែកសម្រាប់អ្នកពាក់ព័ន្ធ លោកបានថ្ងួចថ្ងូរថា ទាំងក្រុមការងារ ក៏ដូចជាក្រុមគ្រូពេទ្យ គឺលោកមានការពិបាកណាស់ ព្រោះម៉្យាង ម្ចាស់ផ្សារហាក់ព្រងើយកន្តើយ មិនព្រមសហការ ម៉្យាងទៀតក្រុមអាជីវករដទៃៗទៀត គាត់ដូចជាមានការស្តាយការលក់ដូររបស់ពួកគាត់ខ្លាំងពេក ព្រោះនៅព្រឹកនេះថ្វីត្បិតតែពួកគាត់បាករើចេញពីក្នុងតួផ្សារអស់ក៏ដោយ ក៏ប៉ុន្តែគាត់នៅតែបន្តការលក់ដូរ នៅតាមចិញ្ចើមផ្លូវពាសវាល ពាសកាល ដដែល ដែលនេះហើយគឺជាបញ្ហា។

បើទោះបីជាយ៉ាងនេះក្តី ក៏នៅព្រឹកនេះ លោកអភិបាលក្រុង ផេង សិទ្ធី និងបន្តចុះជាមួយក្រុមការងារ ដើម្បីប្រកាស អោយពួកគាត់ស្ម័គ្រចិត្តចូលរួម និងអញ្ជើញទៅផ្តល់សំណាកអោយបានគ្រប់ៗគ្នាដើម្បីរកអ្នកពាក់ព័ន្ធបន្ត៕ អត្ថបទ៖ សោ និយមរ័ត្ន