ខេត្តកំពង់ស្ពឺមានអ្នកឆ្លងជំងឺកូវីដកើនដល់ជាង៣ពាន់នាក់និងស្លាប់ជាង៧០នាក់

ប្រធានមន្ទីរសុខាភិបាលខេត្តកំពង់ស្ពឺបានឱ្យដឹងថាគិតត្រឹមព្រឹកថ្ងៃទី១៣ ខែ កក្កដា ឆ្នាំ២០២១នេះខេត្តកំពង់ស្ពឺមានអ្នកឆ្លងជំងឺកូវីដ១៩ប្រមាណជាង៣ពាន់នាក់និងស្លាប់បាត់បង់ជីវិតជាង៧០នាក់។

នៅថ្ងៃទី ១២ ខែកក្កដា អាជ្ញាធរបានរកឃើញអ្នកឆ្លងថ្មីចំនួន៨៧នាក់អ្នកជាសះស្បើយ១១នាក់និងស្លាប់ចំនួន៤នាក់។

លោក វេជ្ជបណ្ឌិត អោ វ៉ាន់ថេន ប្រធានមន្ទីរសុខាភិបាលខេត្តកំពង់ស្ពឺបានមានប្រសាសន៍នៅព្រឹកថ្ងៃទី១៣ ខែកក្កដានេះថា គិតត្រឹមថ្ងៃទី១៣ខែ កក្កដា ឆ្នាំ២០២១ មាន អ្នកឆ្លងជំងឺកូវីដ១៩សរុបចំនួន៣២៣២នាក់ អ្នកជាសះស្បើយចំនួន​២៣៤៨នាក់ អ្នកកំពុងព្យាបាលចំនួន៨០៤នាក់ ផ្ទេរទៅភ្នំពេញចំនួន១៩នាក់ ផ្ទេរមកពីក្រៅខេត្តចំនួន១១ នាក់និងស្លាប់បាត់បង់ជីវិតចំនួន៧២នាក់។

លោក វេជ្ជបណ្ឌិត បានបន្តថា ចំណែកអ្នកធ្វើចត្តាឡីស័កវិញមានចំនួន១៩១០នាក់និងបានយកសំណាកចំនួន៣៩៦​នាក់ស្រី១៩១នាក់។

លោក វេជ្ជបណ្ឌិត បានបន្តទៀតថា ភាគច្រើនអ្នកស្លាប់ហ្នឹងយើងអត់បានព្យាបាលគាត់ទេគឺគាត់មានជំងឺធ្ងន់ធ្ងរហើយស្លាប់នៅផ្ទះមានអ្នកខ្លះចូលពេទ្យបានកន្លះម៉ោងក៏ស្លាប់ខ្លះទៀតមិនទាន់បានព្យាបាលផងក៏ស្លាប់ទៅហើយ៥០​ទៅ៦០​ភាគរយយើងអត់ជួយគាត់ទាន់ហើយអ្នកខ្លះទៀតស្លាប់ដោយសារមានវ័យចំណាស់មានជំងឺប្រចាំកាយដូចជាជំងឺតម្រង់នោម បេះដូងជំងឺទឹកនោមផ្អែមបូកជាមួយគ្នា»។

លោក វេជ្ជបណ្ឌិត បានបន្ថែមទៀតថាអ្នកឆ្លងជំងឺកូវីដ១៩នៅខេត្តកំពង់ស្ពឺមានប្រមាណ៥៥ភាគរយជាកម្មករកម្មការិនីរោងចក្រហើ យពួកគាត់បានបន្តចម្លងទៅក្រុមគ្រួសារនិងបន្តឆ្លងទៅសហគមន៍៕ អត្ថបទ៖ សំអឿន