កូវីដ-១៩

ការចាក់វ៉ាក់សាំងលើកុមារ នឹងចាប់ផ្តើមពីភ្នំពេញ តាមយុទ្ធសាស្ត្រផ្ការីក ដែលធ្លាប់បានធ្វើកន្លងមក

បានផុស

៤ years មុន

នៅ

ថ្ងៃសុក្រ ២៣ កក្កដា ២០២១

ដោយ

មានប្រសាសន៍នៅក្នុងពិធីប្រគល់ និងទទួលវ៉ាក់សាំង ដែលជាជំនួយរបស់រដ្ឋាភិបាលជប៉ុននាយប់ថ្ងៃទី២៣ ខែកក្កដា ឆ្នាំ២០២១នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានបញ្ជាក់ថា យុទ្ធនាការចាក់វ៉ាក់សាំងដល់កុមារ និងយុវវ័យ ចាប់ពីអាយុ១២ឆ្នាំដល់១៧ឆ្នាំ នឹងត្រូវចាប់ផ្ដើមនៅព្រឹកថ្ងៃទី០១ ខែសីហា ឆ្នាំ២០២១ខាងមុខ ហើយសម្ដេចនឹងអញ្ជើញធ្វើជាអធិបតីនៅក្នុងពិធីបើកយុទ្ធនាការចាក់វ៉ាក់សាំងលើកុមារនេះ នៅមន្ទីរពេទ្យកាលម៉ែត ហើយក៏នឹងមានការធ្វើសន្និសីទកាសែតនៅទីនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានោះសម្ដេចនឹងនាំចៅៗ ដែលមានអាយុចាប់ពី១២ ឆ្នាំឡើង ទៅចាក់វ៉ាក់សាំងផងដែរ ជាមួយនឹងកូនចៅរបស់សម្ដេច ឯកឧត្តម លោកជំទាវ និងថ្នាក់ដឹកនាំដទៃទៀត។

បើតាមសម្ដេចតេជោ ហ៊ុន សែន យុទ្ធនាការចាក់វ៉ាក់សាំងដល់កុមារ នឹងចាប់ផ្ដើមពីទីក្រុងភ្នំពេញ ដែលជាចំណុចយុទ្ធសាស្ត្រផ្ការីកជាបន្តទៅទៀត ហើយនៅពេលដែលយើងមានវ៉ាក់សាំងគ្រប់គ្រាន់ យើងនឹងចាក់ឱ្យមនុស្សចាស់ផង កូនក្មេងផង។

ជាមួយគ្នានោះ សម្ដេចតេជោបានផ្តាំផ្ញើទៅដល់អាណាព្យាបាល ក៏ដូចជាមាតាបិតា ត្រូវយកកូនៗទៅចាក់វ៉ាក់សាំង ដើម្បីការពារជំងឺរាតត្បាតកូវីដ១៩នេះ។ សម្តេចបញ្ជាក់ដែរថា ការចាក់វ៉ាក់សាំងនេះ គ្មានអ្វីចម្លែកនោះទេ ប្រៀបធៀបទៅនឹងទារក និងកុមារ ដែលបានទទួលវ៉ាក់សាំងដើម្បីការពារជំងឺច្រើនមុខ ដែលទើបនឹងកើត ដូច្នេះសូមកុំបារម្ភលើបញ្ហានេះ។

សម្ដេចតេជោ ហ៊ុន សែន បានអះអាងដែរថា សម្ដេចមានចៅម្នាក់អាយុ១៧ ឆ្នាំ ត្រូវបានចាក់វ៉ាក់សាំងរួចហើយ ពីព្រោះគេត្រូវចេញទៅរៀននៅក្រៅប្រទេសនៅខែក្រោយ។

សូមបញ្ជាក់ថា គិតត្រឹមយប់ថ្ងៃទី២៣ ខែកក្កដា ឆ្នាំ២០២១ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ១៩ ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន៦,៥៥២,៦៣២នាក់។ សម្រាប់លទ្ធផលចាក់វ៉ាក់សាំងគោលដៅ១០លាននាក់ បានចំនួន៦៥.៥៣ភាគរយ៕

ដោយ ៖ កោះកែវ