គណៈកម្មការគ្រប់គ្រងផ្សារប្រាប់ពីស្ថានភាពក្នុងផ្សារ​ក្នុងដំណាក់កាលរាតត្បាតជំងឺកូវីដ​១៩

ប្រធានគណៈកម្មការគ្រប់គ្រងផ្សាររដ្ឋមួយចំនួននៅក្នុងរាជធានីភ្នំពេញ បានលើកឡើងថា ទីផ្សារមួយចំនួននៅរាជធានីភ្នំពេញ មិនដូចពេលមុនៗនោះទេ ដោយផ្សារខ្លះមានអាជីវករចូលលក់ច្រើន តែផ្សារខ្លះមានអាជី​វ​ករលក់ដូរប្រមាណ៣០ភាគរយធ្វើឱ្យទីផ្សារមានលក្ខណៈស្ងាត់ មិនមានភ្ញៀវចេញ​ចូល នោះគឺដោយសារតែស្ថានភាពជំងឺកូវីដ-១៩មិនថមថយ ពិសេសថែមទៀតនោះ មានផ្សារមួយចំនួនមានអ្នកឆ្លងជំងឺនេះជាបន្តបន្ទាប់ ហើយអាជ្ញាធរក៏បានបិទជាបន្តបន្ទាប់ផងដែរនោះ។

លោកស្រីប៉ុន ដានី ប្រធានគណៈកម្មការគ្រប់គ្រងផ្សារធំថ្មី បានមានប្រសាសន៍អោយដឹងនៅរសៀលថ្ងៃ​ទី២៣ កក្កដានេះ ថា ផ្សារធំថ្មីនៅពេលនេះមានអាជីវករចូលលក់ដូរចំនួនតែ១២៩៧តូបប៉ុណ្ណោះ ក្នុងចំ​ណោម​​​តូបសរុបចំនួន៣៤៧៦តូបស្មើនឹង៣៧ភាគរយ។

លោកហ៊ត វ៉ាន់ធី ប្រធានគណៈកម្មការផ្សារអូរឬស្សីបានមានប្រសាសន៍លើកឡើងនៅថ្ងៃនេះដែរថា ផ្សារ​អូរ​ឬស្សីមានអាជីវករចូលលក់ដូរ ប្រមាណជាង៣០ភាគរយប៉ុណ្ណោះ គឺថយចុះច្រើន បើប្រៀបធៀបពេលមុន ក្នុងតំណាក់កាលកូវីដ-១៩ដូចគ្នា នោះក៏ដោយសារពួកគាត់ខ្លាចឆ្លងជំងឺនេះដែរ។

ប្រធានគណៈកម្មការផ្សារទួលទំពូង លោកចំរើន សុខលីម បានមានប្រសាសន៍នៅថ្ងៃនេះដែរថា សម្រាប់ផ្សារ​ទួលទំពូង មានអាជីវករចូលលក់ដូរ ប្រមាណជាង៥០ភាគរយប៉ុណ្ណោះ ដោយសារថា ក្នុងរយៈពេលចុងក្រោយ​នេះផ្សារមួយចំនួនមានការឆ្លងនិងបានបិទជាបន្តបន្ទាប់ ម្យ៉ាងមិនមានភ្លៀវចេញចូលច្រើនផងនោះ ពួកគាត់ក៏បង្ខំចិត្តបិទតូបតែម្តង។

លោក គួច ចំណានប្រធានគណៈកម្មការផ្សារច្បារអំពៅមានប្រសាសន៍បញ្ជាក់ថា សម្រាប់ផ្សារច្បារអំពៅ វិញ អាជីវករចូលលក់ដូរ ប្រមាណជាង៥០ភាគរយដែរ។ តែសម្រាប់ផ្សា​របន្លែច្បារអំពៅ​វិញលោកសាន់ប៊ុណ្ណា​ ដែលជាប្រធានផ្សា​របន្លែច្បារអំពៅបានបញ្ជាក់ថា ចំពោះផ្សា​របន្លែច្បារអំពៅអាជីវករចូលលក់ដូរ ១០០​ភាគរយ។

បើទោះបីជាយ៉ាងណាក្តីប្រធានគណៈកម្មការផ្សារទាំងប៉ុន្មានខាងលើបញ្ជាក់ថា គណៈកម្មការផ្សារទាំងអស់នៅតែបន្តការផ្សព្វផ្សាយការណែនាំ ការបាញ់អាកុល ការវាស់កំដៅ និងការបំពាក់ប្រព័ន្ធ QR Code “ទប់ស្កាត់​កូវីដ StopCovid នៅតាមច្រកសំខាន់ៗនៃផ្សារទាំងអស់នេះដដែរ និងម៉ឺងម៉ាត់ជាងមុនថែមទៀតផង៕អត្ថបទ៖ ស្រីរ័ត្ន