ខេត្តបន្ទាយមានជ័យ សាងសង់មណ្ឌលព្យាបាលអ្នកជំងឺកូវីដ​កម្រិតស្រាលដាក់បានជាង ៣ ពាន់​នាក់

គម្រោងសាងសង់មណ្ឌលព្យាបាលអ្នកជំងឺកូវីដ១៩ កម្រិតស្រាល ដាក់បានអ្នកជំងឺ ៣ ពាន់នាក់ ស្ថិតនៅភូមិខ្លាកូនថ្មី សង្កាត់កំពង់ ស្វាយក្រុងសិរីសោភ័ណ ខេត្តបន្ទាយមានជ័យ កំពុងដំណើរការសាងសង់ញាប់ដៃ។

នៅល្ងាច ថ្ងៃទី២៧ ខែកក្កដា ឆ្នាំ ២០២១នេះ ក្រុមការងាររបស់លោកនាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាប្រធានអនុគណៈកម្មការសាងសង់នៃគណៈកម្មការជាតិប្រយុទ្ធនឹងជំងឺ​កូវីដ​១៩ លោក អ៊ុំ រាត្រី អភិបាលខេត្តបន្ទាយមានជ័យ បានចុះពិនិត្យគម្រោងសាងសង់​​មណ្ឌល​ព្យាបាលអ្នកជំងឺ​កូវីដ១៩ កម្រិតស្រាលខាងលើដែលមានផ្ទៃដី២ហិចតា ហើយមានរោង២ ដែលមានទំហំ១ហិចតា។

ចំណែកស្រុកព្រះនេត្រព្រះលោក ឃូ ពៅ អភិបាលស្រុកព្រះនេត្រព្រះបានឱ្យដឹងថាក្នុងស្រុកនេះមានមណ្ឌលចត្តាឡីស័កថ្មី១កន្លែងទៀតនៅវិទ្យាល័យហ៊ុន សែន ទឹកជោរឃុំទឹកជោរ សម្រាប់ទទួលពលករខ្មែរដែលបញ្ជូនត្រឡប់ពីប្រទេសថៃវាអាចដាក់អ្នកជំងឺបានជិត ២ ពាន់នាក់ផងដែរ។

ស្រុកព្រះនេត្រព្រះ មានមណ្ឌលចត្តាឡីស័កចំនួន៣កន្លែងគឺ១នៅវិទ្យាល័យហ៊ុន សែន ជប់វារី ឃុំជប់វារីទីរួមស្រុក២វិទ្យាល័យហ៊ុន សែន ឈ្នួរមានជ័យ ឃុំឈ្នួរមានជ័យ និង៣នៅវិទ្យាល័យទឹកជោរឃុំទឹកជោរនេះ សម្រាប់ដាក់ពលករមកពីប្រទេសថៃ។

ចំណែកស្រុកមង្គលបូរីវិញលោករ័ត្ន ដាស៊ីណង់បានឲ្យថានៅស្រុកនេះ មានមណ្ឌលចត្តាឡីស័កធំៗកន្លែង៣ គឺ១នៅវិទ្យាល័យមង្គលបូរី២ នៅវិទ្យាល័យហ៊ុន សែនមង្គលបូរី នៅឃុំឬស្សីក្រោកនិង៣កំពុងរៀបចំមណ្ឌលវិទ្យាល័យ ភ្នំធំ នៅឃុំអូរប្រាសាទ ដែលវាអាចដាក់ពលករវិលពីប្រទេសថៃ ចំនួនជាង២.០០០នាក់។

បញ្ជាក់នៅខេត្តបន្ទាយមានជ័យ មានរៀបចំធ្វើមណ្ឌលចត្តាឡីស័កជាង២០កន្លែង នា៩ស្រុក ក្រុង ក្នុងនោះ១​ស្រុក ក្រុង មានមណ្ឌលចត្តាឡីស័ក១ទៅ៣កន្លែង។

ចំណែកមណ្ឌលព្យាបាលនិងមន្ទីរពេទ្យព្យាបាលអ្នកជម្ងឺកូវិដ.១៩ ជិត២០កន្លែងដែរហើយមណ្ឌលបើកថ្មីៗ ទាំងនេះនឹងប្រើប្រាស់ទ្រោលសភាពការណ៍ទទួលពលករខ្មែរវិលពីប្រទេសថៃជាបន្តបន្ទាប់ផងដែរ៕ អត្ថបទ៖ វ៉ាន់ ណាង