ការបូជាសពអ្នកជំងឺកូវីដ១៩​​នៅខេត្តកំពង់ស្ពឺ​​រៀបចំឡើងច្រើនកន្លែង

ការបូជាសពរបស់អ្នកជំងឺកូវីដ១៩​ នៅខេត្តកំពង់ស្ពឺ បច្ចុប្បន្នរៀបចំឡើងនៅច្រើនកន្លែង ខណៈដំណើរការប្រព្រឹត្តទៅដោយរលូន។ នេះបើតាមលោក វ៉ី សំណាង អភិបាលខេត្តកំពង់ស្ពឺ ប្រាប់កម្ពុជាថ្មី នៅរសៀលថ្ងៃទី ២៩ ខែកក្កដានេះ។

លោក វ៉ី សំណា បានឱ្យដឹងថា នៅពេលដំបូងៗការបូជាសពរបស់អ្នកជំងឺកូវីដ១៩​ជួបបញ្ហា​ប្រឈម​បន្តិច​​ដោយសារតែប្រជាជនខ្លាច ហើយវត្តអារាមមួយចំនួនក៏ខ្លាចដែរ ប៉ុន្តែបច្ចុប្បន្នអាជ្ញាធរ បាន​ធ្វើការ​សម្របសម្រួលជាមួយពួកគាត់បានហើយ។ ម្យ៉ាងទៀត អាជ្ញាធរខេត្តក៏បានធ្វើឡ​ដោយខ្លួន​ឯង​ ទើបធ្វើឱ្យការបូជាមិនមានជួបបញ្ហានោះទេពេលនេះ។

លោក អភិបាលខេត្តបានប្រាប់ថា ទីតាំងបូជាធ្វើឡើងនៅច្រើនកន្លែង ដូចជានៅភូមិ​តាម៉ុល​ក្បែរ​ទីតាំង​ចាក់សំរាម ដែលជាកន្លែងដាច់ស្រាយាល ក្នុងសង្កាត់ច្បារមន ក្រុងច្បារមន និងនៅស្រុក​ឱរ៉ាល់ ពោលគឺកន្លែងបូជានាពេលបច្ចុប្បន្នមានច្រើនកន្លែង ទៅតាម​ទីតាំង​ដែល​អ្នកជំងឺកូវីដ១៩ ទទួលមរណភាព។

លោកថ្លែងថា “យើងមើលទីតាំងដែលនៅជិត យើងយកទៅនោះ បានន័យថា កន្លែងព្យាបាលមាន ប្រមាណ ៧ កន្លែង ចឹងគាត់ខូចនៅកន្លែងណានៅក្បែរជាង យើងយកទៅ​ទី​នោះ​ ឬយកមកពីស្រុកផ្សេងៗ ខាងណាដែលនៅជិតជាង យើងដឹកទៅទីនោះ”។

ចំពោះកន្លែងបូជាសពដែលសង់លើផ្ទៃដី១០ ហិកតា នៅស្រុកឱរ៉ាល់ លោក វ៉ី សំណាង បង្ហើបឱ្យដឹងថា អាជ្ញាធរកំពុងបន្តនិតិវិធី ដោយសារនៅតែរង់ចាំការកម្មង់ម៉ាស៊ីនសម្រាប់ដុតមកពីក្រៅប្រទេស ខណៈការ​សាងសង់គ្រឹះសម្រេចរួចរាល់ហើយ។

គិតត្រឹមថ្ងៃទី ២៩ ខែកក្កដា ឆ្នាំ ២០២១ ខេត្តកំពង់ស្ពឺ មានអ្នកស្លាប់ដោយសារជំងឺកូវីដ១៩ ចំនួន ៩២ នាក់៕