មន្ត្រី បុគ្គលិក កម្មកររោងចក្រត្រូវធ្វើតេស្តជាប្រចាំ

ក្រសួងសុខាភិបាល​នៅថ្ងៃទី ១០ ខែសីហា ឆ្នាំ ២០២១ បានចេញសារាចរណែនាំមួយ ស្ដីពីវិធានការនៃការរួមចំណែកកាត់បន្ថយការរីករាលដាលនៃជំងឺកូវីដ១៩ ដោយតម្រូវឱ្យមន្ត្រីស្ថាប័នរដ្ឋ និងបុគ្គលិកក្រុមហ៊ុន រោងចក្រ សហគ្រាស ត្រូវធ្វើតេស្តជាប្រចាំ ដោយក្រសួងប្រៃសណី និងទូរគមនាគមន៍ បន្តចែកចាយឧបករណ៍តេស្តរហ័ស ក្នុងតម្លៃដើម។

សារាចរណែនាំដែលចុះហត្ថលេខាដោយ ឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល បញ្ជាក់ទៀត​ថា តំបន់ដែលមានផ្ទុះជំងឺកូវីដ១៩ ជាតំបន់បិទខ្ទប់ ត្រូវបានកំណត់ធ្វើការវាយតម្លៃលើប្រជាពលរដ្ឋដែលមានការពាក់ព័ន្ធ និងធ្វើតេស្តរហ័ស ឬធ្វើតេស្ត PCR ស្របតាមបច្ចេកទេសសុខាភិបាល។

ចំពោះកន្លែងយកសំណាកសាធារណៈដោយមន្ត្រីសុខាភិបាលមូលដ្ឋាន ឬក្រុមអ្នកស្ម័គ្រចិត្ត សម្រាប់ប្រជាពលរដ្ឋមិនមានលទ្ធភាពទិញឧបករណ៍តេស្តរហ័សត្រូវរៀបចំនៅតាមស្រុក ខណ្ឌ ឬឃុំ សង្កាត់។

សារាចរដដែលលើកឡើងថា ក្រសួងប្រៃសណី និងទូរគមនាគមន៍ បន្តលក់ឧបករណ៍តេស្តរហ័សរយៈពេល​២ខែទៀត ដើម្បីឱ្យមានភាពសម្បូរ និងបន្សាំទៅនឹងតម្លៃទីផ្សារ បន្ទាប់មកក្រសួងនិងផ្ទេរទៅឱ្យអង្គភាពណា​មួយ ឬទុកលទ្ធភាពទៅឱ្យក្រុមហ៊ុនធ្វើអាជីវកម្មក្នុងតម្លៃសមស្រប។

រីឯមន្ទីរពេទ្យឯកជនទាំងអស់ ត្រូវផ្ដល់សេវាធ្វើតេស្តរហ័សដល់ប្រជាពលរដ្ឋ ក្នុងតម្លៃទាបសមស្រប ដោយប្រើប្រាស់ឧបករណ៍តេស្តរហ័សដែលទទួលស្គាល់ដោយក្រសួងសុខាភិបាល។

ចំណែកឯឱសថស្ថាន ត្រូវលក់ឱបករតេស្តរហ័សក្នុងតម្លៃសមស្របដើម្បីឱ្យប្រជាពលរដ្ឋមានលទ្ធភាព​ទិញ​យកមកធ្វើតេស្ត។

ដោយឡែកមូលដ្ឋានសុខាភិបាលទាំងអស់ ត្រូវប្រើប្រាស់ឧបករណ៍តេស្តរហ័ស ផ្ដល់ជូនដោយក្រសួងសុខាភិបាល៕

សារាចរណែនាំ៖