កូវីដ-១៩

យកសំណាកអាជីវករនៅផ្សារទឹកថ្លាធ្វើតេស្តរហ័សរកឃើញអ្នកកើតជំងឺកូវីដ.១៩មានចំនួន១២៦នាក់ រដ្ឋបាលក្រុងបិទផ្សារបណ្តោះអាសន្ន

បានផុស

៣ years មុន

នៅ

ថ្ងៃពុធ ១៨ សីហា ២០២១

ដោយ

បន្ទាយមានជ័យ ៖ នៅព្រឹក ថ្ងៃទី១៨ ខែសីហា ឆ្នាំ ២០២១ នេះរដ្ឋបាលក្រុងសិរីសោភ័ណ ដឹកនាំដោយលោកហ៊ឹល រ៉ាយ៉ា អភិបាលក្រុងសិរីសោភ័ណ អ្នកចូលរួមពិនិត្យ លោក យ៉ាន់សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណ លោក ស៊ីឌី អធិការនគរបាលក្រុងសេរីសោភ័ណ និងមន្ត្រីរួមការងារជាច្រើននាក់ទៀតបានចុះពិនិត្យផ្សារទឹកថ្លាស្ថិតនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ក្នុងនោះបានយកសំណាកអាជីវករជាច្រើនរយនាក់នៅផ្សារទឹកថ្លា ធ្វើតេស្តរហ័សរកឃើញអ្នកកើតជំងឺកូវីដ.១៩មានចំនួនដល់ទៅ១២៦នាក់ក្នុងនោះរដ្ឋបាលក្រុងបានធ្វើការបិទផ្សារបណ្តោះអាសន្ន ចាប់ពីថ្ងៃបិទនិងជូនដំណឹងពេលបើកឡើងវិញនៅថ្ងៃខាងមុខនេះ ដើម្បីទប់ស្កាត់ការរីករាលដាលជំងឺកូវីដ.១៩ ពិសេសប្រភេទ ដែលតា។

លោកហ៊ឹល រ៉ាយ៉ា បានប្រាប់អ្នកយកព័ត៌មានឲ្យដឹងថា រដ្ឋបាលក្រុងសិរីសោភ័ណបានធ្វើការ សហការជាមួយក្រុមគ្រូពេទ្យបានយកសំណាកអាជីវករលក់ដូរក្នុងផ្សារទឹកថ្លា ជាច្រើនរយនាក់យកទៅធ្វើតេស្តរហ័សរកឃើញអាជីវករកើតជំងឺកូវីដ.១៩ មានចំនួន១២៦នាក់ ធ្វើតេស្តរហូតរហូតដល់ម៉ោង៦យប់ អ្នកកើតកូវីដ.១៩ទាំងក្រុមគ្រូពេទ្យបានយកទៅព្យាបាលនៅមន្ទីរពេទ្យអស់ហើយផងដែរ។

លោកបានបន្តឲ្យដឹងទៀតថា អ្នកមានវិជ្ជមានជំងឺកូវីដ.១៩ រួមជាមួយអ្នកពាក់ព័ន្ធខាងលើបានធ្វើដំណើរចេញចូលក្នុងផ្សារទឹកថ្លាជារៀងរាល់ថ្ងៃ ដូច្នេះដើម្បីជៀសវាងការរីករាលដាលជំងឺកូវីដ.១៩ កាន់តែមានភាពធ្ងន់ធ្ងរ រដ្ឋបាលក្រុងសិរីសោភ័ណ សម្រេចគោលការណ៍និងធ្វើការបិទជាបណ្ដោះអាសន្នការលក់ដូរគ្រប់ប្រភេទនៅក្នុងផ្សារទឹកថ្លាចាប់ពីថ្ងៃជូនដំណឹងនេះរហូតមានការជូនដំណឹងឡើងវិញ។

លោកបានបញ្ជាក់ឲ្យដឹងបន្តទៀតថា ផ្សារនេះបើកលក់ឡើងវិញត្រូវធ្វើតេស្តរហ័សជាលើកទី២ បន្តទៀត បើអាជីវករណាធ្វើការគេចវេសមិនមកពិនិត្យលើកទី២នោះទេ រដ្ឋបាលខេត្តមិនឲ្យចូលលក់ជាដាច់ខាត។ លោកបាននិយាយបន្តឲ្យដឹងទៀតថា វិធានការណ៍ការពារ នៃការឆ្លងរីករាលដាលជំងឺកូវីដ-១៩ ចូលក្នុងសហគមន៍ក្នុងព្រឹត្តិការណ៍២០កុម្ភៈ គឺតម្រូវឲ្យអាជីវករ និងអ្នកទិញទាំងអស់ត្រូវតែចូលរួមអនុវត្តវិធានការសុខាភិបាល ៣កុំ ៣ការពារ និងផ្សារ ដែលមានលក្ខណៈស្តង់ដារសុវត្ថិភាព។

ជាគោលការណ៍ផ្សារសុវត្ថិភាព ដែលរៀបចំដោយរដ្ឋបាលក្រុងសិរីសោភ័ណតម្រូវឲ្យគ្រប់ផ្សារត្រូវតែមានច្រកចូល និងចេញធំទូលាយមានម៉ាស៊ីនស្កេន ម៉ាស៊ីនវាស់កម្ដៅ បាញ់អាល់កុល មុននឹងចូល ផ្សាររកទិញគ្រឿងឧបភោគបរិភោគ និងសម្ភារៈប្រើប្រាស់ផ្សេងៗ។គណៈកម្មការគ្រប់គ្រងផ្សារ សន្តិសុខ អ្នកលក់ អ្នកទិញត្រូវតែពាក់ម៉ាសឲ្យបានត្រឹមត្រូវលើកលែងតែពេលពិសាអាហារ។ បើសង្ស័យដែលមានការពាក់ព័ន្ធជាមួយជំងឺកូវវីដ.១៩ ត្រូវរាយការណ៍បន្ទាន់ទៅអាជ្ញាធរមានសមត្ថកិច្ចភ្លាមៗ៕

ដោយ ៖ វ៉ាន់ ណាង